餐廳
/
日本

心齋橋終極地雷 – 超低CP值蟹店

今次去日本旅行其實無乜Plan,咁啱電話Search餐廳見到有個蟹店優惠就過咗去。網站用咗以下Keyword介紹呢間蟹店:

  1. 3,000日幣就能大吃螃蟹!
  2. 該店大受歡迎天天爆滿
  3. 3,000円就能吃到蟹火鍋、生蟹肉腳、炸蟹腳等

結果星期五晏晝去到並無”爆滿”場面,而係”一個人都無”,”一個人都無”唔係誇張形容,而係真係”一個人都無”,即係包場。最頂癮係,明明一個人都無(因為好重要所以要講四次),係都要我地兩個人坐佢啲仲窄過譚仔嘅位。

先唔講份量少得可憐(其實要講,啲Blogger網頁影埋啲相其實完全無講過張相入面其實係幾多人份量),啲蟹肉無味都一個點食蟹柳都好食過佢,再加上咬落成”pat”嘢爛曬,有合理理由相信係放咗一段唔短時間嘅雪藏貨。最尾呢間蟹店有樣學樣整個飯出黎俾你整個蟹粥,首先舊飯又係硬都唔知放咗幾耐,咁大舊飯反轉隻碟都無跌落街。呢個食法其實一般蟹店都相當普遍,主要俾米粒吸收啱啱蟹鍋湯底嘅蟹味,但正如之前提及,啲蟹係無味嘅(仲要少成咁),請問邊L度黎有蟹味呢? (要講可以講埋個粥係個侍應遞張英文紙仔叫我地跟住黎DIY…….)

呢間嘢講到”天天爆滿”但食啲嘢伏成咁,我係驚到要拎張Tap N Go黎埋單。人均港紙三舊水有多(我地叫兩個4,000 yen 餐加一杯可樂,盛惠9,0xx yen),係咪大阪消費高所以呢個價食蟹就要食垃圾? 其實附近食蟹放題都係差唔多價喎? 呢間簡直係”日本一”級垃圾。

呢個故事教訓係,點無Plan都好,如果被”中文網站”介紹異地餐廳所吸引,最好做多些少Research,睇下Google或者Facebook Checkin 評語。寫呢篇嘢嗰陣先睇返Facebook  評語,原來我唔係唯一受害者,但嗰啲受害者唔係因為睇到某網站有優惠,而係睇某杜姓小姐介紹。To be fair,未必係杜小姐問題,但我本人生平最L憎啲餐廳見到名人Blogger就”加料”,攪到睇介紹同親身食嘅嘢好似喺兩間唔同餐廳食咁,唉…….

2017-08-10

Read More
Model X Friendly
中伏
充電站
推薦
方便泊車