To share what i see…

總所周知我係五月天頭號歌迷，由”心中無別人”年代開始已經鍾意佢地o的歌。我第一次睇佢地o既現場演出正正就係佢地第一次o係紅館開演唱會(BenQ贊助o個一年)，當時先發現，原來聽十萬次Live CD都不及聽一次現場演出震撼，而及後”睇五月天演唱會”已經成為我每年五月定必參與o既活動。我會歸納五月天歌迷有三大特點：

1）普通話唔會太差(唔係點聽呀大佬?!)
2) 有錢(演唱會飛比一般港台歌手貴一截，Stayreal個個月有新款，演唱會年年有新Tee)
3) 歌迷係癲o既

記得我o係紅館第一次睇完五月天當晚覺得意尤未盡，過左幾o個月去o左台北小巨蛋”睇多次”。係咪好癲？未算。有一年o係紅館o既尾場演唱會，五月天唱完最後一首歌，成班五迷”賴死唔走”，當時場館已經開晒燈，又嗌Encore，又唱歌，又玩人浪，玩足半粒鐘，雖然最後五月天五子都無出返黎，但係呢件事足以證明：我地係癲o既!!

去世博睇中國館之前要搶預約票，同樣每年睇五月天之前我地一樣要搶演唱會飛，仲要一定睇最前最貴。坦白講，我以前對睇唔睇到尾場無乜所謂，但自從睇過今年陳奕迅之後，有o左DUO陰影，唔睇尾場唔得喇(尾場唱多o左成粒鐘)! 今年五月天”尾場”由29號加到30號，30號加到31號(在此特別鳴謝朱咪咪六月一號o係紅館開演唱會，否則我可能要追多場)，五迷都用盡不同方法去搶飛，而我最不滿就係大會公開售票安排。

賣終極尾場飛(31/5)o既當日，o的飛唔夠一個鐘已經賣晒咁濟，我見好多人o係Newsgroup話排o左成朝但係買返黎o既位都唔理想，最慘係有人買都買唔到。但慘還慘，香港人係崇尚排隊，認同First Come First Serve，買唔到只能怨自己清晨五點未落到通利排隊。點知賣飛之後o既第二日，第三日，第四日，不斷有On Hold o既飛放返出城市電腦售票網賣，o的位重要靚過第一日公開發售o既，有無搞錯？

如果大會想打擊黃牛，恭喜你們，你地取得大成功了! 但你地有無諗過o個班排到死死下o既歌迷o既感受？”買票只為支持，欣賞到五月天已經足夠”，呢o的說話係五迷同五迷講，唔係你地講。我見有五迷怕旺區通利多人一早唔知搭咩車走入博覽館…….o個個比機場仲要遠o既博覽館，最後買到o既飛比今日Walkin去通利買o既位置仲要差，真係點講都唔通。希望大會可以將心比己，好好諗下來年可以點樣做好o的。黃牛係要打擊，但絕對唔係用損害歌迷o既方法做。

最後希望今年一如以往的，五月天可以有精彩o既演出，五迷繼續盡情High and Jump!!