To share what i see…

近期熱話係高鐵，然後係有班80後反高鐵，究竟應唔應該起呢？我係支持用更經濟o既方案去起高鐵。六百幾億可以做o既野實在太多，點解係起高鐵？至於收地問題，客觀事實係，依家高鐵有點似起焚化爐，走線影響其實當區都一定有意見，問題係政府野野都係夠票就話知你，所以先有咁大反彈，到呢一刻我唔覺得佢地有諗過要點convince市民去做呢件事。”80後”對基建有意見係無可口非，因為依家起三五七年，用家就係我地呢一代人，我地可以享用新基建為我地帶來o既方便，同時亦要承擔新基建可能地帶o既負面後果。我o既問題係：如果高鐵賴o左o野究竟邊個負責？政策出台係好o既話當然做福人群，但係依家做得唔好o既話好似無人需要負責。

舉個例子，當年有政黨大力支持政府推領匯上市同香港起迪迪尼，到依家政黨不單可以唔提以前對政府既支持，仲可以反過來去插政府有關政策，而政府換屆之後前朝o既事又唔多關我事。呢個係千絲萬縷o既問題，功能組別議員唔駛對市民負責，所以就某些議題就算民間有強大反對聲音政府都一定夠票過，市民唔能夠向政府問責咁政府又何需向市民負責呢？

雖然依家圍o左兩次立法會，但係高鐵撥款係無可能批唔到，只係時間問題。將來o既事係無人知，高鐵話唔定真係一樣好好o既基建，但係賴o左o野的話我敢寫包單第一個抗議o既一定係民建聯，如果係咁社會點會進步呢？我始終認為普選係問題o既根本，政黨政治係無可避免o既世界潮流，尤其香港作為國際性城市更加唔可以無。執政黨推政策出台做得好可以累積政績，做得唔好我地可以選擇過第二個人或者政黨上台，做到真正對市民負責，就係咁簡單。

日前我係有參與立會外圍o既反高鐵”嘉年華”，感覺的確好”80後”好多年青人都來參與，無論高鐵最後係點，至少令更多年青人可以敢於表達自己o既意見。當日我第一次親眼見到苦行係咩一回事，每廿六步一跪，在電視報紙睇到o既感受都不及現場見到o既震憾。呢幾日得十幾度仲要時不時落雨，著住件唔太保暖o既衫每日苦行十幾個鐘，去到某o的區仲要俾行經o既阿伯話痴線。 當我諗到呢o的我係好感動，先唔講佢地o既訴求係岩定錯，但作為一個香港人怎能夠話呢班人o係度搞屎棍， 對佢地不動之以情呢？究竟有咩軀使佢地去做呢樣野？

我唔敢為那些80後做代言，但係可以肯定政府唔係好知道”80後”諗咩。好似”戒煙我撐你”呢類廣告，唔知點解到依家政府仍然覺得跳舞加RAP係會Work。對於八十後o既不了解曾俊華司長絕對係呢方面o既表表者，以下一段擇錄自佢個Blog：

隨着社會發展和市民生活不斷得到改善，我們的期望自然會不斷地提高。以住屋為例，第一代港人覺得有三餐一宿、生活安穩已經很滿足，自己擁有的住屋是一個奢 望；嬰兒潮一代可能認為能夠早日「上樓」（獲分配公共房屋）已符合了對住屋的期望；第三代港人覺得「上車」（置業）可以說是必要達到的目標；對一些第四代 港人來說，他們最關注的可能是物業會所有甚麼設施、泳池有多大、私隱度是否足夠等等。

政府要認真評估我地呢一代需要o既係咩，否則將來反彈力將會更大。80後係未來社會o既主人翁，政府係咪應該要先Convince我地呢？

就算同我唔太熟o既人都知我有兩樣野最怕 – “甲由”同得罪朋友。講到得罪人，其實無咩人可以得罪我，因為我真係唔識去恨一個人。有兩個好好o既例子，第一個係我舊老細，旁人對佢Comment有幾”好”就唔講喇，最少我撞到佢都仲可以同佢Say個Hi(而事實上我同佢又真係無咩野既….)。第二個就係我第一個女友…..

還記得當時同佢斷斷續續同佢一齊o左一個比大家想像中的短更要短o既時間，對我黎講分開之後那段時間真係好痛苦，自己就去文化中心飲悶酒飲到嘔血，同朋友出黎玩又要扮無事。係…….真係好辛苦，但係愛一個人應該係希望佢幸福快樂，我選擇o左祝福佢而唔係恨佢。

因為某些原因，跟ex已經分開了好一陣子，我仲好記得見到佢o個陣佢攬住我，我感覺到胸口濕了。那個畫面對我黎講到依家一樣記憶猷新，每次諗起到好痛。我能夠做o既係唔再傷害我愛同埋愛我o既人。

在那刻，我終於明白hurt人o既痛不下於被人hurt，我並非想合理化自己o既行為(我承認我係一個很差勁的人)，而係近排見到友人因為俾ex hurt然後hurt返ex轉頭。或許感情關係真係無分對錯，但係你hurt我時我hurt返你，究竟幾時先hurt完呢？

“點解係我俾人Hurt? ”

或許人生總要經歷最少俾人Hurt一次，失戀對人的成長一定比唔見”武器”的痛來得健康。就算做唔返朋友都唔好選擇去恨一個人。以下係黃子華棟篤笑講過的：

” 阿甲同阿乙去買魚蛋，阿甲問個老闆：點解阿乙食得咁滋味？老闆反問阿甲：咁你想點丫？阿甲答：我要阿乙同我一齊食得唔滋味o羅!! ” 呢個世界唔係咁運作的，點解唔可以一齊都食得滋味？人可以做的選擇可能真的很少，但至少我們可以選擇去放下仇恨吧？

這一年，曾經以為睇化人和事的我，看到更多人性的黑暗令我看不過眼，看不透，卻開不了口。這一年，一些人讓我看到我六年前曾經有的那團火，他們用行動去告訴我：希望還是有的。這一年，我對”人生”二字有了更多理解。這就是我們剛渡過的2009年。

人生就像一場魔術，看到那些表演當然覺得奇妙，但當你知道魔術背後是怎樣做的就會沒趣 。我覺得自己就像Matrix裡的Neo，不是有他的超能力，而是看到的都是那些Digital Rain，就是社會運作的背後，原來可以這樣黑，這樣暗，而更甚的是我們可以當作不以為然。所以我覺得人可以選擇的話還是不要知太多真相，無知是福。

“呢個世界既人死晒…..錢仲會存在……最後錢會審判呢個世界”，這是電視劇”錢的戰爭”其中一句對白，也是社會的Inconvenient Truth。很多事的根本都是沿於一己利益，究竟利益為何物？人類既生存除左為賺錢供樓以外，還有就是寄望下一代可以活得更好。人終需一死，錢賺盡帶不走，而下一代就是社會的主人翁，究竟有幾多有理會過社會下一代需要的是甚麼？

在聖誕節，劉曉波因為煽動顛覆國家政權而入獄，翌日我們的立法會議員，”法律”學者梁美芬這樣說：

在內地同類案件，通常只判三至五年。她指，外國領事聲援劉曉波，有可能引致當局加重對劉的刑罰，「因為佢（中央）可能更加覺得，其實劉曉波不是劉曉波，而是好多外國勢力在背後，可能造成一些反作用，也不出奇。」(原文)

當”覺得”變成”理所當然”，香港的學者也變得人治，怎能對活在的這個地方不感到失望？

上星期Weekend北上，嘗盡美食佳餚，今天打的上班，下車後環望四周，心裡說了句：都係香港好!然而有多失望，然而在Blog常說移民，但我對香港這個家未敢絕望，至少身邊還有不少友好。我經常在Blog上說我得罪人多(事實亦然)，友人說：得罪人多，但係亦都識到真朋友，除笨有精。我在我要感謝友人們對小弟的容忍，我知我係好難頂，來年希望各位繼續容忍我，一起努力吧。

PS: 嚴格上黎講上面係一o的瑣碎o既廢話，唔係Blog文，當我亂Up就可以，多謝俾面 XD

借左部機返黎研究左好幾日，總算修成正果，對於Ovi Store o既體驗稍後會有後續文章講解，今日先同各位分享下暫時小弟在E72(或者S60系機)精選出來軟件。

Ovi Store 貼士：記住搵Software前先Login，否則搵出黎既Software有機會同你部機唔兼容

E72貼士：長按”Home”鍵可以顯示運行中軟體，而在軟件中按拒接鍵可以直接關閉軟體。

現時Ovi Store甚或新買Nokia手機已經預裝頭條日報或者星島日報軟件，兩個軟件都有即日同即時新聞

另外生果報都有提供蘋果日報App，唔止有日報同即時新聞，仲可以背景定時下載新聞。

S60 Twitter Client選擇唔多，如果要揀首選一定係 Gravity，由於Twitter對我黎講係必需品，所以真係要用既話都要買啦，Gravity可以直接在主畫面揀相簿裡面o的相出Tweet。如果唔係常用者可以考慮用網站Mobile版Twitter，近期更新左o既新版Twitter Mobile網站介面更加User Friendly，純粹睇Tweet出文字Tweet都夠晒用。

除講電話以外，大部人在手機上最重要的就是MSN，小弟發現”Windows Live Messenger”同”Chat”對E72兼容都有點問題，暫時測試中可用度最高最完整就是fring，兼且可以支援Twitter，必裝!!

地圖方面，除o左用Default o個個，各位可以考慮用返用開o個個Google Maps，只要o係手機進入 http://m.google.com 就可以Download Google Maps o既Native App。

除左預設網站瀏覽軟件外，用家可以安裝Thrid Party既Web Browser，小弟就裝o左Opera Mobile最新版本落部E72。Opera Mobile充分利用按鍵操作介面間接提升手機可用度(最好係可以Save Password)，我就將睇開Openrice Mobile，eprice等網站儲存o左落Welcome Page度方便除時開黎睇。利用手機進入 http://m.opera.com/mobile 就可以直接下載 Opera Mobile。

我地成日講撚機，究竟撚機係咩__野意思呢？我o既解讀係：因為你唔__識用部機，所以就要撚熟部機，然後自然就可以快快樂樂用部機喇。

為o左試下黎緊最有力同iPhone競爭o既Android系統，尋晚小弟在又一城百記手入o左部Motorola Milestone，昨日岩岩返o左大貨，價錢全線落返HK$4,680正價，Screen protector同代用電已經出埋，換句話說買機應該可以送齊呢兩樣野。由於呢幾日其實唔係咁得閒，加上我撚o左部機成晚到依家我都唔敢講我係完全識得用部機，所以諗住過埋Weekend先正式出開箱文。

暫時小結論係： Tech Guy可能會覺得部Milestone好過癮，因為有好多野都可以”改”，但係對End user黎講部機比較難上手，Motorola又無好似HTC咁提供Sense UI，軟體方面誠意欠奉。之但係咁多人喪讚部機亦唔係無原因，主要係做工好，同類型Size要有Keyboard又要大Screen的話， 加上Crystal Talk呢o的近年少有Smartphone提出o既Voice Enhancement，Milestone的確係唔錯o既選擇，用開iPhone 2G/3G (唔計3GS)可能會覺得佢快好多，不過我覺得部機係Target唔到iPhone o既用戶，開箱文再詳談。

Motorola有樣低能o野一定要同各位分享一下作為2009″最後一恥笑”。買之前已經知道部Milestone影相唔得，Fine。之後發現影相永遠都Focus唔到，據講下個版本Android Firmware 2.01會解決呢個問題，Fine。但最估唔到係原來將部機時間較前或者後一兩年就會解決到Auto Focus問題，在此要特別一讚創造呢個Bug o既Developer，佢成功將洗衣機同微波爐Integrate埋一齊(究竟佢點樣可以搞到Timing影響Focus………好神奇)!!!

臨尾要特別一讚百記員工，佢臨尾幫我貼Protector o個陣，貼o左成個字都唔岩位，然後發現張貼原來Oversize (依家整Protector o的公司為o左快真係可以求其整刀模一味靠估……)，最後佢幫我好有心機慢慢剪細張Protector，前後用左三個字時間。呢o的咁好o既服務真係無諗過原來香港都會有，一定要讚讚佢!!

對業界黎講，IMAX係當今最高清震憾o既電影技術，而對觀眾黎講， IMAX係當今最貴o既電影體驗，未計上網訂飛手續費，位位盛惠HK$170。不過慘得過你今日買飛FULL到下年先有位(Weekend零晨三點半場都差唔多FULL晒)，你真係吹佢唔漲。

講返Avatar，據講占士金馬倫係睇過魔戒覺得當時技術拍到佢想拍o既野所以先決定開拍Avatar(事實上Avatar亦有用上魔戒CG製作班底)，亦有另一種講法係Avatar成本太高(依家出黎個數係五億美金)所以集資都用左唔少時間，後者講法其實頗合理，拍套Twlight收三四億，拍套 Avatar可能真係會再多幾億，但問題係拍Twlight New Moon o既成本只係五千萬，係Avatar o既十分一，所以對投資者黎講Avatar絕對係高風險投資。

講返套戲，其實就係講人類對大自然破壞o既老生常談，故事都係正路不過，用最簡單一句影容就係：真人版宮崎駿電影(無論畫面同內容都有相似地方)。至於大家最期待o既3D畫面場景，從技術角度未見創新，不過為電影所創造o既世界觀的確好新穎。原本驚睇十二點子夜場會訓著特登買左鑵雀巢咖啡頂住，但係睇Avatar的確無訓覺o既可能，因為每個場景都係全新，以往電影未曾有過，令人目不暇給。睇2012死人冧樓你會覺得好勁，但都係預計之內，而Avatar o既世界觀對觀眾黎講係Unexpected。由畫面都為電影世界觀創造o既語言，可見占士金馬倫對Avatar o既一絲不苟。至於入唔入場應該唔駛多講，難度我話唔好睇你地會唔入場嗎？

睇完套戲，有四點對於iSquare IMAX o既少少不滿想講：1) UA老問題：前面永遠有個人頭遮住後面 (Megabox係無呢個問題)，雖然唔係太過份，但…..我可是俾HK$170一張飛!! 2) 銀幕唔知點解有o的紋，雖則唔係好覺 3) UA iSquare 無好似UA Megabox咁提供專為”四眼”而設o既3D 眼鏡 4) 睇Avatar頭段唔知點解o的字幕”周圍走”，不過呢個相信唔係UA問題。

最後俾各位三個重要貼士：1) 睇IMAX都係去返Megabox比較好 2) 揀位一定要揀正中，戴住3D眼鏡打則睇效果會唔多掂 3) Last but not least，千萬唔好急一時之快因為黎緊幾日得返頭幾行而照買飛(尤其IMAX)，睇最後一行同第一行價錢係一樣的，但係睇第一行即係玩自己…….點睇呀大佬?!

據講Digital IMAX(又名Lie MAX，即UA iSquare IMAX所用o既技術)無真正IMAX(Megabox)無咁Crystal Clear (UA翻譯做：比真實更真實)，黎緊有機會我會去Megabox睇多次再同各位報告。

小弟第一次感受IMAX巨幕震憾並非在Megabox，而係擁有比Megabox IMAX再高兩層樓巨幕o既台北美麗華大直影城，當時係睇翻生侏羅館。而震憾o既開始並非在電影開始，而係在IMAX戲院入口。當開始安排觀眾入場前，IMAX院o既十多名員工會由戲院入面列對行出黎再o係門口排成一直線，然後面向排隊中o既觀眾鞠躬並齊聲說：歡迎入場!! 我想講o既係，搞戲院唔係一部放映機加個幕就算__數，係咁簡單o既話我都去搞啦，唔該UA真係檢討下o的坐位設計，但願你地再開新戲院o既時候我唔會再見到前面個頭，感謝。

PS: 順帶一提，UA iSquare 裝修有點俗，跟商場本身格格不入，不過算……對UA真係唔可以有要求…..

如果大家呢幾日有睇過戲或者訂過飛就會知間間戲院套套戲都爆晒廠，除左因為偽經濟有改善，由”2012″帶頭o既十一月到聖誕檔期，電影選擇比往年多o左好多，呢個亦係觀眾入場意欲提升o既主因。

“神探福爾摩斯”基本上係根據原著角色再創作出黎o既故事，羅拔唐尼自從Iron Man鹹魚翻生(但我覺得最出係佢o係雷霆喪星扮黑人)升呢做票房靈丹，福爾摩斯呢個角色的確好岩佢做(同Iron Man一樣有些少”串串貢”)。從Trailer睇套戲似係最Typical o既Hollywood Popcorn Film，不過睇完之後覺得拍攝比想像中有誠意，我特別欣賞羅拔唐尼演譯福爾摩斯o既怪誕味道，反之Jude Law拍得唔太出，變o左單純係票房保險線。簡單而言，比想像中”有野睇”，算有小驚喜吧(入場最好抖足精神，套戲唔係好似trailer係咁爆，主要其實都係文戲)。

Google之所以稱之為神，係因為無o左佢真係會”唔掂”。 好似小弟咁，隨身一定會帶最少兩部電話(因為超人台返工放工時間旺區差唔多一定上唔到網，所以焗帶多部電腦做”保險”)，而Google Sync就可以幫小弟將兩部生果電話o既電郵/聯絡人/行事曆Sync埋一齊，甚或上埋Google個網做Edit，呢個免費Solution對我黎講簡直係做福萬民。亦因為咁，我一拎部E72返黎試所做o既第一件事就係Setup個Google Sync。

如果各位或者E系機用家有用過Google Sync就會知道，其實佢係一個Microsoft Exchange戶口，理論上o係Mail for Exchange一做好設定其實就已經可以Sync齊所有o野，不過E72呢個新版Mail for Exchange唔知點解Sync唔到Contact之餘，睇電郵只係睇到標題但係睇唔到內容(可能係Google問題啦，哈哈哈哈哈哈哈哈~~)。就呢個”情況”我o係Google(又係Google…)做o左好幾日Research，電郵收發可以直接用返E72內置o既Nokia Messaging係做返Push Gmail，至於Contact同行事曆可以同各位做個小分享去解決以上情況，順道同各位E72用戶講：唔使再o係Google Search “E72 Google Sync”，亦唔好再試Mail for Exchange連接Google Sync，睇我呢篇文就可以解決到你地既疑問。

Read more…

有好多節日對我黎講都係不明所以，唔係唔知So哥Birthday，而係唔明點解聖誕要送禮物，而禮物又要交換，當然講到尾都係為開心啦(無論係賣定係買o個個)。

我唔係”綠色塔利班”，車我照渣，真係唔記得帶環保袋我係會照買膠袋。不過咁，同常交換返黎o既禮物只會撚一次(即係拆開o個下)o既機會超過五成，真係會用o既一成都無，連我呢個唔多環保o既人都覺得有點浪費。好似”城市低級”同”登出” o的USB Toy真係純粹玩野，仲要好大機會同其他人撞送埋同一樣禮物。作為實際派o既我建議各位不妨送o的比較實用o既野，好似呢位同學收到o既禮物就真係十分實用喇!

另類交換禮物指南

我係一個好鍾意試新戲院o既人，以前一有新戲院開我一定仆到去試，就算遠至數碼港我都去睇過。近年覺得The Grand Cinema，荃灣/奧海城百老匯對我黎講已經係無得彈，反之較新o既戲院好似MCL德福，甚或岩岩先開o既UA iSquare同嘉禾Citywalk都俾人鬧到爆，搞到我都無咩癮特登去貼錢買難受。

尋晚岩岩o係中環食完大餐，諗住睇十月圍城。雖然已經上左有一個星期，不過間間戲院都好FULL下，最後揀o左岩岩提及o既UA iSquare。查實我對UA印象都幾差下(請參考我認為列入經典戲院o既UA東薈城)，唔係IMAX片都唔過UA睇，不過咁岩UA iSquare有位，兼且用手機上 m.cityline.com 購票的確好方便 (主要係因為Credit Card資料一早Save左落戶口，唔駛再打過)，所以即管試下。唔計IMAX院，UA iSquare有四個院，一二號院我無留意，但係我睇o個間三號院同Phoenix院就真係激細，個screen 同港威差唔多細，係座位比較好坐搭救返，不過再要去睇o既話就免喇。我一直提出o既理論係，去一間好o既戲院同一間唔好o既戲院，其實票價都係差唔多，點解唔去間好o的o既？

講返十月圍城，有人話係港片年度之最不為過。電影前半係文戲後半係就開打，後者明顯屬商業考量，雖則有些少Over但我覺得還好啦。整體黎講我覺得係值得入場一看，尤其電影好多講孫中山搞革命o既內容都可以套用o係當下，值得觀眾深思(最奇怪係呢套戲竟然可以o係內地上)。尋晚睇九點十竟然有人十點半先入場，我上講記住唔好遲入場，因為呢套戲個頭真係好重要，亦令我一路睇落去o既時候唔能夠唔諗套戲好多對白都有弦外之音……