今年大年初六晚，talkonly節目做到翌日零晨三點，食埋宵夜(其實可以叫做”早餐”了!!)已經差不多係”清晨”將近五點。我渣車送占士返屋企，之前淨係知佢o係旺角轉N車回家，但係無諗過佢屋企原來遠到連我渣車都覺得勁遠，當時o係度諗：平時佢o係talkonly做成幾粒鐘節目之後搭小巴到旺角轉N車返屋企第二朝點返工？我在車上問佢：咁樣返屋企仲要咁夜咪好”lor”命？佢答：唔”lor”命。
最近心裡我經常對各talkonly主持有個疑問：點解要做talkonly？我經常話talkonly唔係自負盈虧，因為從來都無固定收入，所以talkonly只係一個”自虧”節目。個個星期五晚捱更抵夜做talkonly，返到屋企零晨三四點，仲”支力”過返工但係一個仙都無，真係值得嗎？
我本身其實唔係咁鍾意講o野(以前搭小巴唔係最後一刻無人叫落車我都唔會叫)，口才亦唔了得，只係誤打誤撞o係科網泡沫年代o既Radiorepublic開左個節目，而又咁岩識到小黃做就初期o既talkonly。初期talkonly並唔係諗住講IT，又係誤打誤撞講o左一集寬頻o野變o左做IT節目直到現在。話就話今年係talkonly十週年，其實斷斷續續中間有四年無做到，那段時間有一年我落o左腦場做Sales，可能因為返工講太多，所以工作以外愈來愈少講o野。說話少o左換來係聽多o左，而咁多年來o既聆聽換來一個小總結係：我相信人性本善，但大部人口講同心中所想都會有所差異。
記得有一次請o左個o係學校工作o既嘉賓上黎節目，開台前一齊食飯閒談，當時我在談及校園吸毒問題，嘉賓問我呢o的敏感話題可唔可以細聲o的講。我反問嘉賓點解唔可以o係公眾場合談及社會問題？講真心話應該係人類最自然o既本性，點解永遠要遮遮掩掩？我唔係想怪嘉賓，但實情係當社會人人唔敢或者唔想講真話o既時候，人一定唔會開心，社會衍生問題亦會愈來愈多。而talkonly所堅持係講真話，我地所讚所彈o既未必係所有聽眾所認同，但一定係我地所相信。
答返第一個問題 – 做talkonly真係值得嗎？在我個人而言，此時此刻我仍然覺得值得做。QA經常話o既talkonly風格就我o既解讀係 – 主持中不同立場所產生o既火花。可能大家覺得QA鍾意認叻，但係佢提o既o野夠尖銳，占士雖然說話唔多，但係一句到位，ifg代表住佢o個代，A網友係最有心做資料搜集，地畢最Hyper，馬高對Palm始終如一。我對這樣的talkonly主持組合珍而重之。雖然我對talkonly這種自虧製作模式仍然擔心無以為繼，但無疑因為咁talkonly先可以暢所欲言，無須向任何利益團體賣帳，我相信呢個世界點都要有好似我呢o的咁o既傻仔去顯得聰明人有幾聰明吧？
talkonly一集節目長度分分鐘比某些網台一週節目長度總和還要長，因此與其話講台係一個”節目”不如話係一個”台”。而我經常都有呢個疑問：聽Archive 的聽眾要分多少天才聽畢一集節目？在此小弟十二分感謝各位友好及高質素聽眾對talkonly的支持，當然亦要感謝主持們這些年來的付出。但願talkonly接下來可以好好維持，未敢突破， 但求繼續能為各位聽眾服務，謝謝。
黃子華在其棟篤笑講過：社會，科技o既進步同時帶來一o的問題，而呢o的問題佢認為未必能夠解決。
大約一星期前，一名姓趙女子在YouTube上傳一段短片，內容大致係因為廿蚊差價而鬧爆一位Shop Manager。後續發展係，”網民”不滿趙小姐所作所為引起一場起底浪潮。除左相片，住處，就讀大學之外，最新消息係有網民投訴佢涉嫌逃稅。
在此我不多講A有幾岩，B有幾錯。在文明社會之下，你桶我一刀並不代表我要桶返你一刀，兩者唔應該有因果關係。所謂”起底”是對是錯我不敢作一個客 觀定論，但我的主觀判斷認為事情已經發展到過火的地步。趙小姐做的是對是錯我不多談，要談的倒是我們這些在食花生等睇戲的站在甚麼位置。
文章主旨”網絡欺淩”指出的不單是網民對趙小姐的攻擊及起底，還有就是在看這件事情發展中的我們，如果我們將事情當作娛樂版C1頭條來作茶餘飯後的 話題，我們某程度上已經是”網絡欺淩”的一份子。說坦白，我沒有道德光環，唔睇唔講無可能，至少希望各位明白大家站在甚麼位置，應該甚麼心態看待這件事。 如果各位覺得起底組做得好，有好戲睇的時候，下一個被起底可能就係你。
這件事的發生亦令我想帶出兩個問題，首先趙小姐再一次給大家一個正面教訓 – 唔好將你屋企擺上網。我一直認為上網用Facebook Twitter已經等於出街露械，乜野都俾人睇晒，但最重要唔係點樣避免呢個情況發生，而係要接受呢個事實。講就咁講，不過有o的無謂既相(工作證之類) 可免則免。FB最好唔好有同事連繫或者最好公私分開。最後一句，自求多福。
另外有關這件事有一方好像未有人提及過的 – 論壇負責人。那些坐擁大量廣告收入的大型論壇，為甚麼論壇負責人可以完全沒人察覺問題嚴重程度讓事情發展得那麼”順利”，可能我說網絡需要監管令你感到不 悅耳，但我更怕這句說話是由政府說出來。話說回來傳統媒體每每在這些起底事情發生後大大聲講：網絡無王管。容我Quote下今期東週刊封面故事的最後一句：
趙燕萍濫用網上平台攻擊他人固然不對，但網民肆意侵犯別人私隱亦不見得道德，看來是時候研究如何加強監管網絡世界。
看看東週所謂保障事主的薄格相片，在此我要向那些佔了便宜又要批評”網民”不道德的傳媒說句： 你們比你們口中不道德的”網民”更不知所謂。
September 7th, 2009
admin
十四歲教科書，熊澤老師話長大就係：黑色唔可以話係黑色，白色唔可以話係白色。
我所認知既長大係：有o個句唔可以講o個句，呢個世界無對錯，只有既得利益，歷史都要改變。
可能我講既野無人會明，好抽像……其實我都唔係好明。點解政府拍咁多廣告叫人唔好吸煙，又擴大禁煙範圍，但係又繼續俾可以賣煙？點解馬會開賭，又同時撥款幫人戒賭呢？呢個社會對我黎講真係好奇怪。
我提出咁多奇怪既點解源於”林兆鑫事件“，我唔係明光社人，無道德光環，我接受坦白從寬，不過呢條友竟然企圖掩飾失當，我諗唔到點樣可以原諒呢個人，而最後法庭亦判囚廿五個月，奇就奇在好多達官貴人都有寫求情信幫佢。難道現實社會就好似學校那樣，可以用優點抵消缺點？如果係咁究竟做幾多件好事先可以抵消一件壞事？
熊澤老師續說：如果長大就係這樣，咁我寧願我個女唔會長大。
(電影門票仍在百老匯IFC, 電影中心及AMC又一城有售。)
電影橋段通常都是這樣的：好人對壞人，壞人最後被好人殺死了。其實人生怎會是這樣非黑即白呢？有時看這樣的電影太多都沒有感覺，是晚忙裡偷閒，於Palace IFC欣賞了”音樂人生”這部記錄片(其實唔算”忙裡偷閒”，因為我早了近一個月訂飛，實在太多人看，卻太少場次)，該片給觀眾思考空間很大。
下段文字包含該片少量內容
然而該片名稱叫”音樂人生”，然而”主角”黃家正在片中講述音樂對他人生的重要性，但實情是人生大於音樂，音樂只是為貫穿整條記錄片。我對KJ的音樂才華不感好奇，這個世界的天才實在太多了，我驚奇的是但他從11歲已經提出為甚麼人會存在，我感覺到KJ對人生的不滿意，我感覺到他的人生之只能寄情於音樂，KJ的人生是只有音樂還是只能有音樂？
我十分欣賞KJ強調的Human Being，那些道理現在大部份成年人都可能遺忘。每一個人都應該認清每一件事的本質，否則事便會變得沒意思，人生便沒有了Human Being。有些觀眾看畢該片覺得KJ幸運，幸運在生於富裕家庭，幸運在有一個很好的啟蒙老師。我看畢該片卻覺得自己比他幸運，因為我人生能夠選擇的比他多。
還記得數星期前我以”除了感謝，還有感謝”在talkonly論壇內答謝網友對我們的支持。今次要對網友說的是：除了抱歉，還有抱歉，因為這次飯局的確拖得太耐，小弟因工事繁忙實在未能抽時間安排有關活動，另外亦希望每次活動可以有點”意義”才決定舉行。
是次飯局係因為小弟願賭服輸所以請各位聽眾食飯，日期已鐵定為九月十七日星期四晚舉行，暫定係食中菜，希望大家唔會Expect有鮑參翅肚，但係一定唔會得白飯俾你食。是次活動係有收費的，每位HK$50 – HK$100，你想俾HK$50定HK$100由你選擇，收益將不扣成本全數捐出。
在上星期節目已經提及過，我仍然算擇了鮮魚行學校作為是次活動之受惠機構，因為我想大家再次記起這家對本地教育別具意義的學校。香港人善忘，今天大家好像只記得正生書院，而事實上需然幫助的又豈只一間正生書院。可喜的是，我相信香港人善忘不善變，敬請各位多多支持，謝謝。
活動截止日期為本月廿五日，有興趣參加者請電郵至 talkonly@talkonly.net ，我們會盡快電郵給閣下付款資料及確認，謝謝。
自小弟幾年前因為幫人而俾人擺左上檯甚至爭o的要上ICAC嘆咖啡，我已經知呢個世界係無公平存在，公平係人定，唔係神定，所以”上天係公平”呢個講法我係相當有保留。不過我深信呢個世界係有”平衡”，比喻說你一個月人工有一萬，但係李嘉誠一秒可能已經賺到，你身家計埋底褲可能都係得幾十萬，但係李嘉誠求其一間公司資產值都過億，咁係咪代表李嘉誠會開心過你十九幾萬倍呢？答案梗係唔係啦！我唔會話呢種係公平，因為佢真係好很有錢，我只會話係一種平衡。
因果關係是世界定律，任何人都要透過付出先會成果，我唔相信成功有捷徑。要去批評”靚”模係一件幾咁容易既事，但背後佢地既努力甚或壓力似乎無人問津，書展應唔應該賣寫真我唔敢講，但係唔該o的人唔好一邊睇一邊小。作為消費者，寫真係可以唔買既，TVB o的劇你覺得低能你係可以唔睇，雜誌誨淫誨盜你可以唔揭。o的師奶自己買完本八婆週刊睇完之後周圍同街坊講：呢本野很黃很暴力，然後師奶o的街坊又各自各買一本黎睇，再同佢地o的親朋戚友講形成名符其實層壓式推銷，究竟係邊個錯邊個岩？真係o個班誨淫誨盜的傳媒錯晒？真係o個班落足力水鬧爆傳媒既師奶岩晒？淫審條例殺到，站在月球咁高道德既家長到時一定舉腳讚成。當香港管盡網界變港版綠霸既時候，白頭人送黑頭人，害了下一代的就是現在這些家長。
PS：我，真係唔多信香港人係咁有道德，明光社幾時會鬧爆過馬路衝紅燈既香港人? 係呢，咁多人話CCTVB o的劇低能，點解無人要求ATV做得好o的o既？
電影同電視唔同，無記可以一直用互界同爭家產做劇集題材…..一直食老本都賺大錢。電影就唔同，業界好努力去尋求突破希望大家唔會買老翻唔會BT而係去戲院欣賞電影。好似UA院線咁，佢地o係外國引入IMAX技術令觀眾可以在巨幕欣賞A級荷里活電影，另外近期本地戲院亦引入3D數碼放映技術吸引觀眾入場。岩岩所講既都係西片招數，咁港產片又有咩奇招呢？
最近有套港產片搵打手o係各大Newsgroup Forum不斷發文狂讚套戲，屬真屬假不得而知，但係o個o的打手就被網友圍攻，如果俾著係我咁樣俾人圍就一定據理力爭，但佢無咁做到…….即係話…..佢好有機會真係打手黎。Anyway，有人話因為睇完”打手”影評原本想入戲院睇都變左等DVD，証明打手唔係萬能，分分鐘有反效果。諷刺既係，殺人犯無打手，但係全城觀眾一致喪插反而惹起更多觀眾想入場既意欲。
就如殺人犯廣告Slogan所講：不能承受的結局。一睇到最尾o個半個鐘迷底終於解開，全場觀眾都起哄，因為真係估佢唔到，有o的人覺得劇本亂黎，我覺得劇本還可以，不過導演無能力處理，說服唔到觀眾有個咁既Ending。我覺得個迷底唔係一般垃圾，係特別垃圾。有傳戲院加排人手o係電影播放期間巡視，唔係驚盜錄，係驚有觀眾睇到要割凳。呢個故事話俾大家聽，電影唔一定好睇先會有人去睇，十分難睇既災難(對觀眾黎講)片一樣有市場。小弟同朋友們講千萬唔好睇殺人犯，點知佢地反而更加想睇，原本無諗過睇既都有興趣入場咁話，人既反叛心態認真奇特。
影帝代言既卡X蘭應該都無咩人唔知係咩，因為無記差唔多每個Weekend晚上都有佢地既廣告雜誌，o個位精靈婆婆真係化左灰都認得佢，將廣告製作成類似教會既佈導會宣揚產品既”神奇”功效其實幾踩界，呢個都算…..我忍佢。不過今晚o個集佢Quote左位阿嬸講：多謝上帝俾我認識卡X蘭，令我健康改善左好多。我唔係基督徒亦唔係天主教徒，我唔介意佢用盡一切特異功能去Sell佢o的產品，但係點解要拖埋上帝落水？上帝造物主，唔係你地卡X蘭既代言人，唔該!!
遊行目的未必在於要政府尊重自己的意見，而是對自己尊重，對自己有所交代。同樣地，對「本地免費電視節目服務牌照」中期檢討發表意見他們未必會聽，不過總算對自己作為香港市民有丁點交代，一盡公民責任。
- 有人話睇無記好似索K，既嚴重影響健康，亦會睇上癮，藏毒更加唔在講係犯法。我認為睇無記極其量只係似吸煙，雖然影響健康兼睇上癮，不過無犯法。小弟認為既然無記有一定觀眾群，就算有人覺得點唔好睇都應該繼續容許無記為香港市民服務，但同時應該盡快透過引入更多競爭令其節目質素有所提升。
- 有人話魚樂無窮係亞視最有創意既電視節目，更有人話魚樂無窮曾經係亞視最高收視既節目，這個既是事實，也是笑話，更加是悲哀。亞視長年積弱，透過不同新股東不斷注資以維持電視台運作足見亞視本身出現根本性問題，按照這樣的理解，就算亞視不斷蝕錢兼無人睇，只要有”畫面”廣管局都會繼續容許亞視經營，這是不合乎邏輯的。
- 如果話因為亞視有一兩個節目帶起收視就給他們繼續經營亦沒有道理，因為免費電視節目服務牌照是給予有能力提供每日一整天廣播的機構，如果只有一兩個節目有理想收視兼且並非長期的，那大可以透過其他媒體播放而無須佔用整條廣播頻譜。長年積弱導致收視率越來越低，收視率低導致廣播收入越來越少，收入少導致制作資源越來越少，這個惡性循環最少已維持數年，亞視問題延長多一天去解決都嫌長，因為其佔用之服務牌照乃香港市民之公有資產，每個香港市民都有權利及機會觀賞有關機構之廣播。
- 廣管局應撇除外行人管內行人架構，避免延續今天免費電視局面之悲劇。同時廣管局應盡快引入競爭，Google第一天只是Yahoo的技術供應者，今天已領先Yahoo兼且是同業龍頭，亞視沒資格亦沒能力與無記競爭，但不代表無記永遠能夠取得絕對優勢，一但政府引入更多競爭，我相信行業必然有更大發展空間以達至同業幕前幕後及香港市民三贏之局面。
你未必會玩Tap Tap，不過無論載入速度同畫面流暢度都爭幾條街(玩其他Game都係)
NetBugs是...