To share what i see…

自從”一生人必去食店 – 明漲壽司”一文刊出後，迴響甚大，更甚係得到高登巴打賞識，簡直係威過上CNN。坦白說我是始料不及的，因為到呢一刻小弟仍然視陰陽路十二之生化壽司為當今世上最經典食評，論文字功力小弟不及佢一成。借此機會我先回應一下部份網友的疑問。

1) Youtube上看到杯入面有飯o既短片，應該係上一檯客食唔晒壽司將舊飯倒落隻隻杯再放隻杯上杯架的。我個人當然唔鼓勵浪費食物啦(唔計舊梅菜扣肉壽司，對上一次劣食團我地Order o個二三十碟係全部清晒o既)，不過難保有人第一次去明漲唔知唔係件件壽司都擺得落口，所以係可以理解但未能苟同。

2) 對於”俾少少錢唔好要求多多”呢種講法，雖然明漲有堂食難以與超市壽司比較，不過同樣價錢在超市所買到的壽司份量應該相差不遠。再者小弟從來無話過明漲半句不滿，更甚好多友好經我介紹後都好想去試試傳說中要趁熱食o既熱飯壽司。

“食”對我黎講唔單只係味覺體驗，亦係環境體驗，從不同地方食店去觀察週邊食客是一件有趣的事。好似食明漲咁，有人覺得明漲係劣食地標，但係亦有人覺得明漲係優質廉價壽司。我經常都話：去了解一件事或者一個人，必須要從一樣o既角度，一樣o既視線去觀察，依家機會黎喇!!

自上次劣食團後，不少友好都話我點解唔預佢，因此小弟決定會安排多一次劣食團Regroup，暫定係再下一個星期期中一日，各位友好有興趣可以o係以下網址揀返邊日得閒，夠六個人就會成行，以最多人去o個定為最終出發日，謝謝。

PS：正如有人所講： 板左板右會食物中毒，但就真係無聽過明漲有o的咩事，所以我相信食明漲係安全o既。

http://bit.ly/201003sushit

7/3 有興趣參與下一輪劣食團請看 明漲劣食團Regroup

眾所周知香港係美食天堂，各式各樣美食包羅萬有，食店要突圍食物水準一定要有番咁上下。不過好食係唔足夠o既，因為o係香港呢個美食天堂大把好野食。在云云競爭中，香港有一食店悟出驚世道理 – 做唔到天下第一好，就要做地獄第一差。 無錯!! 一千間食店，有九百九十九間都想做最好o個個，唯獨一間要做最差，計下數就知做”最差”呢個市場係好容易壟斷的。

坦白講小弟已經唔係第一次惠顧呢間野，佢有幾”得”我十分了解。再次惠顧係因為小第看畢當今網絡經典文學之一”陰陽路十二之生化壽司“(如果我今日死o左咁呢篇就係我呢生人睇過最好o既食評，蔡瀾都要死開)，跟朋友們談及該文引起本人萌生再搞地獄團之念頭。而地獄團前前後後都籌備好一段時間，係因為團員名單改了又改，最後出黎o既大部份都係talkonly主持，可見無番咁上下老友真係鬼同你去，去得o既都係有情有義，真朋友!!

當晚我地一行六人破地獄，本諗住閒日無咁多人，最後都等o左兩三個字。

低脂三文魚壽司 – 唔單止健康，仲好環保(睇下碟面就知!)

沙律壽司 – 將椰果，菠蘿，車厘子，粟米整合o既壽司!!

甜蝦壽司 – 終於多左條毛…….係甜蝦至真!! (平時係一舊一條的)

海哲壽司 – 有魚翅的!!!!

肉鬆壽司 – 跑馬拉松中途有水站，食明漲都要抖下氣，呢舊食落已經係最似傳統壽司(at least飯有飯味，肉鬆有肉鬆味)。

紅豆軍艦壽司 – 該款壽司近年已經上o左神檯，甚少o係迴轉帶出現。當我地同Waiter話要三客紅豆軍艦壽司，佢當堂面色一沉，知道我地係識貨之人黎踢館挑機打大佬。正所謂影評唔講Spoiler，呢舊神檯級壽司o既味道留待各位自己親身感受下。

多春魚壽司 – “為食總司令”幟哥畢生鑽研唔同o既海鮮烹調方法，我諗佢萬料不到原來多春魚可以拎黎做壽司!!

(必點!!!)梅菜扣肉壽司 – 遠睇似梅菜扣肉，近睇似鹹魚，由於我係無食到，所以對佢o既真正身份唔太清楚(下文有講點解無食到….)

剛從迴轉帶上方杯架拿出的杯(該文最後有片睇)

今次再戰明漲，絕對保持到水準之餘，亦有不少驚喜。首先係馳名o既熱飯壽司終於有o的改變，除左北寄貝壽司係熱飯外，其他壽司都係冷飯，尤其係炸尤魚鬚壽司，明明睇住佢岩岩整出黎擺上迴轉帶， 估唔到舊飯凍，條炸尤魚鬚仲凍，好似岩岩o係雪櫃拎出黎(仲有些少雪水味)，感覺非常新潁。另外一大驚喜係梅菜扣肉壽司，如果話食紅豆軍艦壽司係打大佬，咁梅菜扣肉壽司應該係Hidden Mode o既超級大佬。 A網友開頭食o左半舊就無食然後講左句oshit!!(日文好食的意思)，小弟認為好野應該同各位分享，所以當時無食到。直到差唔多埋單，由於該壽司賣相實在太吸引，情不自禁地拎起隻碟近距離索o左一野 ………. 氣味先令我有做大肚婆的感覺(作嘔作悶) ，繼而感受到母愛之偉大(感動落淚)，此時此刻我終於明白 – 舊壽司係拎黎聞唔係拎黎食的，各位準備去明漲的話必點(又或者外賣定幾舊，跑跑下馬拉松暈低左既話俾佢索一索保證彈返起身)!!!

事實上明漲分店遍佈港九新界，食客對於其他分店評價亦相當正面，何解偏偏西九店成為劣食地標？外界對呢個問題眾說紛云，有人話呢度就係明漲o既庶務二課，所以搞成咁。亦有人認同本文開頭所講 – 做唔到天下第一好，就要做地獄第一差，邊種講法先正確？呢個係一個……謎!! 無論如何，明漲壽司憑住不斷努力創新，敢於求變o既態度令佢地製作出日本都食唔到，全銀河系只此一家o既Fusion Sushit。

兩次的劣食團後段，我地觀看四周食客，都會有個疑問：點解佢地食得咁開心？隔離檯一位女仕，坐佢旁邊o既似係佢個仔，疑似係阿仔帶阿媽食”好野”。團員訪問個阿媽問佢好唔好食，阿媽一邊搖頭一邊答：å好食!! 此時小弟終於茅塞頓開，亦強烈建議各位一生人一定要去多次明漲壽司。阿仔帶阿媽， 阿媽話好食係引證母愛o既偉大，阿爸帶阿仔去係教識阿仔做人要刻苦耐勞，情侶分手可以叫對方”不如一齊去食明漲壽司”作為借口，聽到o個個一定會話：你係咪想分手？男o既求婚前亦可邀請對方去食明漲壽司，如果可以一齊食完面帶笑容離開，咁可以證明佢係一個可以挨苦，可以共患難o既好女仔，娶得過!!!(小弟亦借似機會為部份食評話食明漲o既就係MK兒女作出平反，食得明漲o既都係克苦耐勞o既好男仔，好女仔!!!! ) 所以話食明漲係充滿無限可能，帶俾你o既快樂比迪迪尼更多，而講緊只係付出五草野有找，快o的約埋班Friend黎西九，食好野!!!

給死士的忠告
- 由於佢地係無Menu的，壽司都係憑空想像出來，建議先搜集本文及其他食家”推介”(梅菜扣肉壽司個名係我作的，因為真係唔知咩黎，所以呢個抄低都無用)，整理好再列印清單以方便Order。
- 最好搵個講急口令叻o既朋友負責落Order，因為呢度waiter唔wait人，我怕你講得慢的話Order o左一半佢已經走o左。
- 盡量坐迴轉帶旁邊，好多新Fusion料理都係咁樣發掘出來的。

烈士的引證 – 明漲雙子塔

小弟雖不能與各位同年同月同日生, 但能同年同日食明漲, 總算共過患難. 一齊硬趙過紅豆壽司, 今後以兄弟相稱!!

無錯，又係講辣!!

暫時黎講o係本地食川菜我最欣賞係四姐，不過麵食方面首選都係聯記同傷心酸辣粉，其中傷心酸辣粉肯定係食得最多，因為唔使排長龍兼且就腳，最好係傷心酸辣粉收零晨點半，落去食宵夜最理想(酸辣粉份量真係食唔飽我，做宵夜岩岩好!)。前排渣車見到o係葵興葵涌道對出有間”外婆酸辣粉”，尋晚諗唔到食乜之際就決定食呢間。

入到店內，未落Order未坐低，我聞一聞店內既”辣味” – 係呢隻味!! 簡單而言”外婆酸辣粉”同”傷心酸辣粉”食既野接近一樣，係”外婆酸辣粉”小食選擇比較少，不過大路野口水雞，夫妻肺片同青瓜都有。味道方面良間都差唔多，我唔敢講”外婆”好食過”傷心”，不過一定唔會差過先。對我黎講”外婆”好有驚喜，不過睇黎間野未被Openrice開發，所以人流甚少。我既結論係，各位可以當”外婆”係”傷心”既分店，住九龍區既唔使特登入黎試，相反住新界區既就多左個就腳選擇。

:

外婆酸辣粉
電話： 26102083
地址： 葵涌葵涌道1001號德昌大廈地下24號舖
Openrice

在較大的地圖上查看NetBugs 美食版圖

串燒好多人都愛吃，不過要食得飽通常都所費不菲(相對啦)。以前青衣長發村巴士站對出有個阿婆o係街邊整炭燒串燒，到依家為止仍然係小弟食過最大份最抵食既串燒，可惜自從領匯重整商場後趕絕左車仔檔，呢檔阿婆串燒絕跡人間。講返o的”尚存人間”既，近期小弟食過四間串燒都唔錯可以為各位推介。

1) 華記小食 – 位於尖咀寶勒巷分叉位既華記小食，串燒水準Keep到，兼且係四間當中整得最快，岩我呢o的EQ低既人。友人最鍾意o係度買完落附近酒吧開餐，而我就鍾意呢度既秋刀魚同埋佢個沙嗲底，算係比較突出。

在較大的地圖上查看NetBugs 美食版圖

2) 和味 – 對正西九龍中心正門，過左十一二點可以坐o係出面食，呢度最出名係燒原條茄子，小弟試過的確一流，至於其他食物就一般啦(主要問題係份量激少)。留意多人既時候可能要等兩三個字。還有就係，食酸辣粉最好過返隔離街傷心食….

在較大的地圖上查看NetBugs 美食版圖

3) 棟篤食 – 呢度既棟篤脆雞同串燒都唔錯，最特別係串燒個沙嗲汁，唔只有花生味，仲真係有粒粒花生，小弟都係第一次見識咁既醬。

在較大的地圖上查看NetBugs 美食版圖

4) 美食佳 – 呢間o係紅磡既串燒車仔麵小店算係區內奇葩，零晨三點去到o的檯檯凳凳霸晒成條街咁濟，原因好簡單：平。兩個人食串燒埋單HK$80一找可以飽既算係咁啦。

在較大的地圖上查看NetBugs 美食版圖

除左食辣，小弟亦特別鍾愛泰菜(其實都係食辣 XD)。如果話干炒牛河係茶餐廳既代表，咁菠蘿焗飯應該係泰菜既代表。細個o個陣第一次食覺得好新奇，因為o的飯真係用原個菠蘿載住。不過食到今時今日我一直都有個疑問：究竟個菠蘿係咪Second Hand？

近年泰國菜館好似少左用原個菠蘿，就算有原個菠蘿載住食落除左菠蘿粒個飯真係無咩菠蘿味。有時食到差唔多都會搵筷子篤下個底 – 硬過石頭，有點懷疑究竟個菠蘿係咪re-use？所以為左下家著想我食完通常都會破壞個菠蘿以免有下手接貨。

今日去左間泰菜館食菠蘿焗飯，因為個飯帶有好強菠蘿香味，所以心血來潮試下挖舊菠蘿出黎食。雖然我仍然覺得二手菠蘿呢個Urban Legend係真既，但至少呢間我食個個菠蘿底，應該係Brand New既!!

泰豐泰國菜館
電話： 23343271
地址： 紅磡黃埔民泰街
Openrice

在較大的地圖上查看NetBugs 美食版圖

話中國最識食不為過，基本上除左碟之外上得餐檯既都食得，甚或頭髮都可以變豉油，呢o的係鬼佬個腦進化到世界末日o個刻都諗唔到既發明。

Anyway，小弟都係”雜”食之人，食得最多係豬雜，其次係牛雜，而今次為各位介紹係小弟都小食既雞雜。當天小弟只係叫左碗雞雜粥同一杯凍奶茶(據聞腸粉都幾得)，已經飽到不行。原因之一係杯奶茶真係好大杯，其二係碗粥的確真材實料兼且極大碗。粥底味就幾好味，不過就係因為太好味有些少懷疑落左味精，小弟喜歡係佢o的粥入面既菜脯粒，小小鹹味配粥幾醒胃。雞雜份量好多，唔會食完一塊雞腎就無第二塊。明記雞雜粥算係o係電影中心附近，睇戲前後去”開粥”不失為一個好選擇。

地址：油麻地永星里1號
Openrice

在較大的地圖上查看NetBugs 美食版圖

飲食節目既公式化程度與劇集不遑多讓，奈何兩個電視台偏偏不斷製作呢o的節目。廢話界代表有亞記收視一姐黃麗梅，無他既，因為佢主持既飲食節目大部份都亞視既收視奇芭。浮誇界代表有蘇玉華，佢既演技的確無可置疑。就係因為飲食太悶，只要節目Format有少少唔同就唔難取得成功，蘇Good甚或前身”一粒鐘真人蘇”算係呢方面既表表者。

過往蔡瀾先生既飲食節目其實都幾公式化，不過蔡生既人生歷練的確豐富，往往飲飲食食時的分享都很有趣，所以無記亦一直搵蔡生”添食”多做幾緝。蔡生可能都知道Keep住公式一年做一緝都會乾塘，所以今緝”蔡瀾品味”多左食以外既野，亦做得放左，”真話”講多左。唔計佢條友集集內容都滲佢自家出產，其實佢講野都幾直接。第一集明讚暗踩政府之餘，其中一段介紹天地書店o個陣同店長講：買健康書唔會健康左，買經濟書唔會有錢左，係既你就唔會o係度做啦。句句入肉，要o係大台節目內踩得咁應，當今唔計無記既港台時段我諗真係得蔡瀾一人做到。

有時睇飲食節目最有趣唔係睇o的野有幾好食，而係睇主持們食完既反應。剛才提及既蘇玉華最據觀賞價值，一般黎講唔太好食既野佢會用浮誇既表情”好好食呀”去蓋過真面目(有關表情可以參考食神Opening 食水晶膠溝雙氧水o個位廚師)，反之好食既時候佢係唔會講野係咁食同埋微笑，唔信可以o係MyTV睇返上一緝蔡瀾嘆名菜。

睇返上星期o個集蔡瀾品味一開頭介紹o個間蘇三茶室，只要仔細睇下佢地幾個表情就知出事。陳貝兒Comment左咁耐只係用左”特別”兩個字，睇黎蔡生介紹純粹係俾面派對。睇返開飯Comment，我唔敢話佢地好客觀，不過有位網友既食評太精彩請容許我在此Quote：

雞湯飯,雞無雞味飯無飯味,湯就勁多味精味
哪個所謂煎白羅白肉餅飯,簡直好似放兩件羅白榚係碗飯上面,羅白煎到勁黑,飯就似隔夜壽司飯.
奶茶就更不中不西,用lipton茶包.
鴨胸面食到我老婆大人黑口黑面,勁多味精.

呢間野係咪真係咁難食我唔敢講，但作為喜歡食既我公平些少我會去食一次再同各位報告。節目中段有介紹小弟最愛既聯記，而聯記既川北涼粉亦係蔡生至愛(佢之前o係報紙雜誌介紹親聯記都係用涼粉做開頭)，你睇佢食到眉飛色舞同開頭食蘇三爭咁遠知道分別o係邊喇。

究竟打邊爐係邊個發明？我問過Google神，太概係N年前唔知邊個朝代既發明，由一鍋過整熟再分食物演變到依家一路”拾”一路食。計我話都係懶之過，Skip埋廚房拎出廳個Step先有今日既打邊爐。

一年三百六十五日打邊爐係幾時開始？其實四季火鍋o係香港好早已經存在，不過要講真係”流行”應該係稻香開始？真係唔肯定，但稻香之前打邊爐食物選擇的確無咁多”花臣”。

上星期因為流料ROY極力介紹去左新填地街既和味菜館，算係旺區少有甚或係唯一既炭爐打邊爐地方。除左炭爐，另一大特式係座位，大部份檯都係放o係後巷，可能o係blog度寫各位好難相信，但的確佢地條後巷異常整潔。當晚(閒日)去到已經九點幾，”後巷”位已經無晒(笑話一則：話說再對上一個星期流料ROY同佢友人去幫襯坐後巷，可能太嘈關係， 樓上有人倒水落黎，佢隔離台中晒招，所以要坐後巷位記住揀有帆布遮住的，唔係呢個笑話可能變成閣下既悲劇)，我地一行三人上左去樓上室內位睇睇環境，不過上面唔係用炭爐之餘仲要煙霧瀰漫，所以最後都係等左兩三個字坐左個地下半Outdoor位。炭爐精妙之處在於室外既自然風o係你一邊食既期間會一邊幫你潑火，所以個一路食個火都會一直火光紅紅，我地就失敗o的，因為坐o個個位唔係完全Outdoor所以唔透風，亦都因為咁個撚左個火成三四個字先食得。

講返食，其實得幾句。手切肥牛的確十分正(唔好叫美國肥牛)，丸類餃類都係必試。整體黎講三個字講晒：食風味。因為坐唔係特別舒服，食物唔係特別好食，湯底亦無其他酒樓咁多花臣，但一定唔會難食，純粹係見識下炭爐係點打邊爐既話一定唔會令你失望。 一般黎講夜晚七八點去一定有位，有興趣既搵晚涼返些少不妨一試!! (問我邊度打邊爐最得我首選仍然係滿口福)

後話：當晚等位時巧遇食環處 架白色VAN仔，其實後巷打邊爐梗係有問題啦，但係架白色VAN仔只係隔一條街停左o係度幾分鐘，老闆就熄左後巷o的燈，食環處o的人就當睇唔到。你地可 以話食環處唔做野，但另一方面呢o的可能就係所謂既”規矩”，你唔做得太過火佢地亦唔會搞到你做唔到生意。而佢地亦好識做有定時定候清理街道垃圾，分分鐘比普通街道更要乾靜。

地址：旺角新填地街282/咸美頓街
電話：23884018
Openrice

在較大的地圖上查看NetBugs 美食版圖

小弟好辣係唔少朋友都知道的，食野係求開心唔係為啖氣，老實說我食傷心酸辣粉都只係食到”BB辣”，”小辣”已經唔多得，鐘意食辣同食得辣係兩回事，我係屬於前者。

今次介紹既四姐川菜係位於灣仔一棟住宅大廈內，地下要先禁鐘上去。因為當晚比較多人老闆安排我地坐一間細房，其實應該係佢地”住處”，名符其實”私房菜”。”四姐”收費係定額位位HK$200的，點到幾多菜就視乎有幾多人，越多人去點既菜當然越多，小弟比較大鄉里，唔多知道係咪通常私房菜都係咁收費。如果真係要比同聯記比，我覺得”四姐”有一樣十分重要既優勝之處，就係每道菜既味道都有所不同，食得辣既人都知道好多店都有個通病就係辣得好食，但係道道菜都係一個辣味，”四姐”辣菜都算係味道多樣化(其實佢地有唔辣既菜)，這是小弟十分欣賞的。小弟特別推介有四川涼麵，辣得來有少少酸，相當開胃。另外有水煮魚，夠滑夠辣仲要夠多!! 話說原本係一行四人但係有一個遲左成個鐘先到，佢黎到其實我地三人都食到七七八八，我地叫多左個涼麵同水煮魚，老闆特登再送多個碟菜同青瓜，水煮魚份量仲要加大，原本差唔多飽既我地直情係飽上加飽，抵食!!

基本上呢餐係食得飽滿有餘，自問盆水煮魚都食左幾多，但係最後都要打包，仲要分三個發泡膠盒載。建議有返四五個人以上先好上去食，記住要先訂位。

地址：灣仔駱克道285-291號高華大廈2/F
電話：28022250
Openrice

在較大的地圖上查看NetBugs 美食版圖

我同大部份香港人一樣，十分喜歡行大商場，無他的，有野睇，有冷氣涼，連個廁所都好過我屋企o個個。大商場為香港人帶來便利的同時亦令到香港越來越少特色，每個商場都係一個Clone，食既都係板前板後，著既都係Uniqlo，Izzue，好處係去呢o的連鎖店只需要揀最近o個間就可以，但大商場只引入大型連鎖店變相令消費者選擇少了，所以非由大地產商所管理之商場仍然有其存在價值。

因為工作同住處都係葵青區，所以成日都會去葵芳搵食(青衣真係無咩食)，尤其係葵涌廣場。早年通頂o係葵芳做完野放工一定會去開24×7既草根食堂，麥記早餐四點先有，佢地早餐三點已經有，每次都係食早餐A – 火腿通粉 (有無人知點解早餐通粉default一定係配火腿？)。唔知幾時開始，葵涌廣場三樓變左條食街，由放學到放工，放工到宵夜都係場面墟冚，近期”食街”由三樓延伸到二樓，大家樂對面開左間賣台式飲品既”麻吉兄弟“，唔洗講當然係人頭湧湧。另外回味無窮亦都擴充營業，細鋪變大鋪。”回味無窮”即係新都會天橋直入葵涌廣場行到最入，自不然就會聞到好香既咖喱味，無錯，呢間就係”回味無窮”。可能你食左佢o的咖喱魚蛋咁耐都唔知佢叫”回味無窮”，其實佢o的糕品好似紅豆糕亦都非常得。o係”回味無窮”行入些少斜對面有間”小廚獅“，除左一樣有咖喱魚蛋，呢度仲有外賣飯天使麵之類，小弟試過佢個細碗肉醬珍珠飯，肉醬好足料，而且所謂細碗一o的都唔細碗，重點係 – 碗飯只係十蚊就有交易，絕對係平霸，我諗平時學校放飯o個陣呢間野會幾好生意!!

最後想介紹係三樓既”Fusion Ice“，坦白講Fusion Ice既棉棉冰唔會比糖白府既差，甚或喜歡小甜的話會覺得Fusion Ice更好食，夠棉夠味，價錢亦只係糖白府既一半(廿蚊有找)。不過由於店內無坐位，要人地企o係度食咁大盤冰的確有點難，所以生意似乎唔太好，希望唔會結業啦，因為呢間算係我o係香港食過最好既棉棉冰。