To share what i see…

小弟好鍾意去唔同戲院睇戲，因為咁樣可以比較唔同戲院坐位同影音效果，當年遠至數碼港，近至The Grand Cinema我都係第一時間入去”試睇”。就小弟多年睇戲經驗，港威算係數一數二唔掂o既戲院，不過正所謂一山還有一山低，小弟終於見識到真係垃圾戲院。

話說小弟尋晚去完昂平360 o係東薈城UA睇七點七o個場葉問，應該係假期關係，全場八九成滿，我坐o係約尾五尾六行。一坐o係度就發現前面o個個人個頭遮住個銀幕1/3咁濟，我唯有打側個頭黎睇。初頭以為係自己問題，後來發現隔離o個個男仔都係打側。事實上現時一般樓底唔夠高或者唔夠斜既戲院都會安排一行座位靠左，一行座位靠右這樣梅花間竹避免前面觀眾會阻檔後面觀眾視線，無獨有偶沙田UA都有類似問題但可能銀幕較高感覺上無咁嚴重，不過東薈城UA只有中前排採用這類梅花間竹安排，中後排全部係頭擋頭。如果第十一行觀眾因為第十行觀眾阻擋視線而顎高頭，如似類推最後o個行o既觀眾應該要企起身先睇到。這是我人生第一次睇戲見到有觀眾因為睇唔到銀幕而o係電影開始時間不斷調位以求能夠看到銀幕。而我得出o既結論係：你要確保能夠看到一個長方形o既銀幕而唔係好似一舊芝士俾老鼠咬咁幾忽o既話，兩個人去睇最好買埋前面o個兩個位，如果你係有良心可以買埋後面兩個位避免有人買左後面而因為你個頭擋住睇唔到銀幕。

我個人認為，一間戲院最低要求係：完整睇到銀幕。根據Wiki資料顯示，東薈城UA開業八年，算比較新一批電影院，設計竟然如似不知所謂。坦白講，今時今日The Grand Cinema同Palace IFC票價並非貴UA好多，UA真係要好好檢討下戲院設計。如此戲院，對觀眾不尊重，更甚是對電影不專重，葉問一部好電影就這樣被糟撻。

小弟鍾意食，早前為各位介紹過青衣的車仔檔，相信已經成為集體回憶。記得好多青衣朋友都話以前車仔檔開到兩三點，三五知己買完大包細包車仔美食，從長發村行出海旁，食住碗仔翅吹水，入OK再買兩支酒把酒言歡。成日話香港人食得講究，所謂講究未必係指一定要魚翅啷口，餐餐飽魚，其實食得開心同食得豪華完全無關係。小弟試過食一餐每位幾百蚊既法國餐，份量之多唔知邊個可以食得飽，最後食o左個麥記做宵夜，此時此刻，麥記既薯條都可以好好食。

我不時o係度諗，其實點解香港唔可以有類似台北夜市？香港特色街頭小食實在太多，我建議政府於各區選址並重發類似流動小販牌照俾車仔檔可以係指定地方經營，此舉可以為車仔檔主幫補家計，亦為市民提供多一個廉價選擇甚或成為旅遊景點。當局亦可以考慮為車仔檔提供或資助購買較安全之器材。

其實政府一直都有做類似的項目，但通常最後都唔理想。我認為很多時政府政策的無心插柳都會帶出一個給人奇怪的感覺：以前唔好既野無左，以前好既野都無左，現在o既野差左。政府好應該參考昂平市集這個反面教材，所謂特色商鋪，講穿左其實只係主題K房 - 換湯不換藥，整到古色古鄉懶古舊，其實入面都係Starbucks。我認為類似青衣海濱長廊是很有潛力做夜市，以地區居民需要以設立的夜市，政府只要肯開綠燈，我相信所需公帑很少，不過卻可以幫到不少人。

剛剛睇睇下電視訓著左，在半睡半醒中聽到電視話”回購領匯”，以為自己聽錯”雷曼”做”領匯”，再聽多次，真係講”回購領匯”，原來有政黨建議回購領匯股份令政府”重拾”公屋商場話事權避免領匯對小商戶大幅加租。只能夠講，現在改變不了甚麼，回購或多或少令小股東不利，如果私有化的話產生的問題更大，油水唔多小股東一定Say No，反之油水多納稅人又係咪咁慷概同意政府斥資私有化呢？早知今日，何必當初呢？個人認為，領匯作為”收租股”，所作所為無可口非，上市公司唔同你講利益，咁講咩？要追究就應該追究政府。

我本人算係半個領匯受惠者，唔係因為我有買佢o的股票，而係小弟架老爺車泊o係屋村停車場，近期領匯推出o左隨意泊計畫，每個月俾多HK$388就可以於上午八點到深夜十二點任泊全港大部份屋村停車場，剛好小弟工作地方附近有屋村停車場，就係咁年中真係慳唔少，仲未計去其他地方泊車，似舉令即時提升屋村停車場使用率兼且賺多一筆，領匯真係有o的辦法，不過更有辦法o既係小弟親眼看過的”青衣美食城”。

唔知大家仲記唔記得我早前寫過篇有關青衣車仔檔o既文章，估唔到領匯真係開o左個位俾佢地。領匯特登將長發村商場舊有於中間電梯拆走，改建於旁邊，沿有位置就開左四大間鋪賣車仔檔賣o既野，更以24小時營頁作賣點，據講有o的以前做車仔檔o既人都過檔領匯。相對以前夜晚於巴士站一排”車仔”o個種氣勢的確略為遜色，不過始終依家係拎正牌做生意。如果大家有見識過”青衣美食城”，就會知道o個四間鋪完全唔係商場一部份，純粹為抗衡車仔檔，我欣賞領匯係佢至少肯做o的野出黎俾大家有得揀，唔係單純抹殺車仔檔。雖則”青衣美食城”始終未能跟車仔檔文化比較，但在此我仍給領匯一個Credit。

從海角七號，聽無樂不作，聽范逸臣，原來第一次聽范逸臣係N年前佢翻唱I Believe。不過第一次聽范逸臣之前，我已經聽過”馬拉桑”馬念先唱歌。好似大家都無咩印象，如果講糯米糰呢個組合大家會唔會印象深o的(話晒同林狗做過拉闊)？小弟岩岩迷台灣音樂既時候好留意糯米糰，其中佢地第二張專輯絕對係耐聽專輯，當我再拎出黎聽既時候小弟為大家推介其中一首歌 - 巴黎草莓。

我們的政府發生了甚麼事？

恐懼鬥室系列(SAW)係我最鍾意o既電影系列之一，主角由正正常常到最後要互相撕殺。近期民調經常說我地對政府滿意度愈來愈低，其實正確說法應該是政府施政令我們愈來愈失望。我地香港人已經接受o左自求多福，工照返，唔靠政府，但係稅照俾。我地祖國主席話：搞好自己國家已經係對世界一份貢獻。我話：特區政府唔好諗搞好經濟，維持正常運作我地香港人已經要去黃大仙還神。

但係政府連最基本運作都明顯出現根本性問題，唐英年o係回應遲遲未有包機o個句”集體決定”簡直係屈機o既典型例子，問責制已經名存實亡。昨晚的士堵塞交通，說坦白，我係十分理解班的士大佬，如果政府真係會聽人講野，短加長減應該未必實行到，激進手法真係政府逼出黎的。特區政府由強政厲治變成每事慢幾拍，實在很難說服香港人。包機Delay幾日，李少光以不在香港為由卸責，敢問特首同佢o的馬仔平時係咪真係完全唔睇電視唔睇報紙？我認為，政府就算唔先知先覺，慢一拍按電子傳媒掌握民意，香港人都仲接受到。按民意辦事，做錯都唔會有人怪你，講”視民意於我如浮雲”o個個真係無賴黎。但我覺得政府仲有一班被忽略o既無賴 - 行政會議，聽佢地講野，你會以為行政會議並唔屬於政府一部份，可以彈一間餐廳o的o野唔好食，但其實自己就係餐廳大廚。有位行政會議成員講o左句：因為梁展文事件令官員處事欠彈性，我心中只有三個子：賴地硬。再加埋財爺前排講左句：我地會按交通情況再研究回購兩隧。你地o的高官去管火星好了。

經過沙士，前幾年經濟好返些少，到依家金融海嘯。不禁自問，究竟”前幾年經濟好返些少”其實會唔會只係祖國給我們的抗生素？到現在金融海嘯，我們是否對抗生素已經產生抗藥性？難度陶傑經常說的港人治港注定失敗是真的嗎？那五十年後是否應該One Nation One System？

好多朋友都覺得小弟係做PCCW或者Y5ZONE，成日問我佢住或者做o野o個度有無免費Wifi用，我話無，佢地一定話：你電腦咁叻，實有辦法o既!! 今次朋友問我o係醫院有無計Wifi上網(無覆蓋，點變個Hotspot出黎呀?!)，我話：乜醫院唔係唔可以有無線干擾咩？原來依家因應手機普及限制已經無以前咁嚴，但係o係精密儀器附近都係熄o左佢好o的。友人舉o左個比較”有趣”o既例子，當有人o係病床過世，友人都要去”處理”(難聽o的…即係”執屍”)，”處理”之前一定要睇心跳錶成一條直線(即係無心跳)先可以”處理”，不過附近有人開住手機o既話，條線就會跳下跳下，所以友人要叫家屬先熄手機先可以”處理”，touchwood講句，大家記住喇 XD

我其實好鍾意食甜品，夜晚o係街食完正餐o既話都會去許留山坐低食個甜品，小弟鍾意食芒果，最愛就係多芒西米露。不過到近一兩年，我去許留山食價值差不多三十蚊o既多芒西米露，芒果食十次，十一次都酸。反而長發村晚上的走鬼檔，十幾蚊一碗多芒西米露，啖啖芒果，而且仲係甜，唔食過真係以為因為環境污染呢個世界無晒甜芒果。你可以話因為許留山坐得舒服o的所以貴o的，但係勁酸芒果真係點講都唔通。Anyway，走鬼檔的價值無可置疑。

走鬼檔係香港一大特式，以前細個農曆新年，初一逗利是，初二就係掃街日(其實點解初一二可以違例泊車，走鬼檔可以唔使走鬼？)。小弟家住青衣，附近長發村巴士總站每晚十一點過後就會有”車仔檔”陸續開檔。可能有人會覺得”車仔檔”唔衛生，不過講唔衛生一定唔及旺角食店，車仔檔就算點唔衛生，你都一眼睇晒，舖頭門面光鮮你睇到，後門又如何？友人曾經講過佢另一位做食環處o既友人有一日去查旺角某間食店，一聲”查舖呀!!”，老闆即刻拉大閘，狂掃小強老鼠，不消一分鐘開返閘”請入黎丫!!”，你話驚唔驚？

小販管理隊係走鬼檔剋星，但係小販管理隊係做咩嫁呢？我眼見o既小販管理隊係每隔幾日一車van仔黎，走鬼檔有既定”逃走路線”，黎到永遠都捉唔到人，坐o係架車度一陣就走，然後走鬼檔唔知o係邊度出返黎，成件事只能用三個字影容 - 多舊魚。

如果小販管理隊做o既o野係同大家講”我黎過”，咁不如唔好做啦。走鬼檔唔係無人幫襯，賣o既又唔係E仔K仔，點解政府唔乾脆搵個地方安置佢地？我認為將走鬼檔改做成特色夜市唔係無得做喎，賭波可以規範，呢o的唔Involve道德高地o既東西不是更容易規範嗎？

小弟今日睇左林超賢o既”証人”，原本只係想簡簡單單講下套戲就算。不過諗諗下諗返前排睇左套同樣係Made In Hong Kong 陳木勝o既”保持通話”，兩片甚或其導演都係拍警匪片老手，請恕小弟不才黎個兩導大比拼。

睇返Wiki，原來大部份陳導o既電影我都有睇過，反而林導o既寥寥可數。小弟以至網民一致推崇o既”江湖告急”就係林導作品，有睇過o既話一定會記得黃秋生飾演o既關二哥，而我就最記得張耀揚飾演o既”有情有義”手下，另外”重案黐孖GUN”都係我既心水作品。小弟唔識用專業角度介紹林導，但我會講佢o既電影唔太正路，就以”江湖告急”o既任因久為例，並唔係我地睇開古惑仔o個種大佬，詳細唔講，真係買隻HK$20 VCD睇下啦各位(其實唔買都得，TVB年中weekend都重播N咁多次)。

至於陳導，又係主觀直覺睇戲，我覺得佢有o既budget往往多過林導，所以佢拍親o既戲大場面一定多，一定大。(我平時同朋友講開新警察故事就一定會提會展天台o個場，點解會展天台會有張台？)可惜呢個優勢反變成陳木勝o既負資產，有o的場景format實在用得太多，睇都睇到悶，將一堆野用車或者人推散……永遠唔會反車o既車戰，前排先有電台節目數十個成龍電影常見場景，陳木勝都唔可以置身事外，可以俾人咁數其實都幾核突。睇返今次”証人”車戰，林導呢個新嘗試CG雖要有待改進，但已經算係唔錯。反觀”保持通話”o既車戰，感覺似玩踫踫車咁，香港真係需要個high class o的既導演。

我諗如果唔係之前有套西片叫撞車(Crash)，咁”証人”應該叫”撞車”比較適合。演員各有各搶戲，主角謝霆鋒叫座力只能屬二線，不過睇得出佢真係好落力，有一場俾人打o既戲睇得出佢係俾人真打。智叔同家輝風頭有點蓋過主角，尤其家輝做呢個奸角做得好出色。張靜初同孖女都好好戲，尤其係細路女，前途無可限量。

有人話霆鋒o的戲唔得，我岩岩開始睇都覺得佢同個角飾唔多Match，不過看畢電影覺得還可以。至於戲唔得，我認為一來的確有進步空間，二來可能年紀再大些少，多點歲月年華歷練觀感會更佳。總括而言我覺得”証人”比前排o既”保持通話”好得多了，係小弟繼”第一誡”後本年度第二套要為大家推薦必定要入場睇o既港產片，當係奶粉錢俾霆鋒賺下都好丫？

PS：本文其實並無大比拼之意，只係明小陳木勝…….如有被誤導者，請見諒 :p

小弟其實都幾鍾意一個人旅行，我地成日講旅行散心，意思就係離開一個自己熟悉的地方，因為可以俾自己多一點空間，這個空間可以讓自己休息一下，也可以思考一下。幾乎每次去台灣都是住西門町，但最嚴惡也是西門町，好難想像搭了個多小時飛機台北的街頭上，走到阿宗麵線旁邊，十個人有廿個人也是說廣東話，全部都是自己友。天呀？咁同旺角有咩分別？所以去到捷運站，求其上，是旦落，唔跟旅遊書走先係最過癮。

我再對上一次去台北曾經見識過當時號稱穩定度最高的貓空纜車，無獨有偶貓空纜車開辦初期跟香港昂平纜車一樣問題多多，上個月貓空纜車的基座更因颱風關係被淘空4公尺，可能跟未做環評及水土保持計畫有關，問題比昂平纜車有過之而無不及。

幾個月前在台北時跟台灣朋友搭過貓空纜車，及後回來香港時再跟友人搭昂平纜車。可以肯定地說，纜車香港的比較舒適，風景更是大比數勝貓空纜車，因為由地面乘貓空纜車上到山上沿途其實沒有甚麼風景可言，只能影容貓空纜車是運輸工具。但昂平纜車由起點到終點都是一流風景，由世界第一機場到大佛都一覽無遺，名符其實觀光纜車。

但很可惜，昂平市集實在太沒特色，而沒特色這個特色也是香港的其中一個特色。每個商場都是Esprit，G2000，百佳，去任何地方最終買的吃的都是一樣，好聽一點就是方便，難聽一點就是：悶。昂平市集這個遠離繁囂的地方，食的是滿記，Starbucks，Eurogogo，我去葵芳新都會好了！我最大疑問是：點解優之良品都o係度？只能說港鐵公司浪費了昂平市集這個地方，香港商人思維是否只會諗點樣可以收最多租？不如拆鬼o左昂平市集起座APM o係度上蓋再起十座山頂豪宅好了。

在貓空山上，我看不到Starbucks，看不到大型連鎖店，只有一些名不經傳的店舖，坐在山邊，沒有香港山頂餐廳的香港夜境，但仍能遠望台北101，食店食物未必是甚麼美食，不過優閒的感覺足以滿足心靈，這樣說可能有點禪，還是要各位自己去體驗一下。期待貓空纜車重開

PS：黎緊市建局有機會重建士丹頓街，希望不要變成假保育，扮古蹟的東西出來。

越安全o既地方往往越危險呢句說話真係唔會錯。

幾年前o既年三十晚，小弟同朋友行元年宵，自己走左去Data Centre裝機裝通頂。我坐左o係電腦面前釣魚，當我裝到零晨四點幾五點o既時後，突然”澎”一聲，成部iMAC 20″咁大舊石屎跌左落黎，舊石屎墜落位置同我坐個位只有唔夠半米距離，如果我坐左o係o個個位我諗都凶多吉少。事發過左成分鐘都唔覺有Staff黎睇咩事，我走左去叫佢地黎，個Staff見到都話：嘩~咁大鑊？！唔知係自己大命定黑仔喇……