To share what i see…

自從”一生人必去食店 – 明漲壽司”一文刊出後，迴響甚大，更甚係得到高登巴打賞識，簡直係威過上CNN。坦白說我是始料不及的，因為到呢一刻小弟仍然視陰陽路十二之生化壽司為當今世上最經典食評，論文字功力小弟不及佢一成。借此機會我先回應一下部份網友的疑問。

1) Youtube上看到杯入面有飯o既短片，應該係上一檯客食唔晒壽司將舊飯倒落隻隻杯再放隻杯上杯架的。我個人當然唔鼓勵浪費食物啦(唔計舊梅菜扣肉壽司，對上一次劣食團我地Order o個二三十碟係全部清晒o既)，不過難保有人第一次去明漲唔知唔係件件壽司都擺得落口，所以係可以理解但未能苟同。

2) 對於”俾少少錢唔好要求多多”呢種講法，雖然明漲有堂食難以與超市壽司比較，不過同樣價錢在超市所買到的壽司份量應該相差不遠。再者小弟從來無話過明漲半句不滿，更甚好多友好經我介紹後都好想去試試傳說中要趁熱食o既熱飯壽司。

“食”對我黎講唔單只係味覺體驗，亦係環境體驗，從不同地方食店去觀察週邊食客是一件有趣的事。好似食明漲咁，有人覺得明漲係劣食地標，但係亦有人覺得明漲係優質廉價壽司。我經常都話：去了解一件事或者一個人，必須要從一樣o既角度，一樣o既視線去觀察，依家機會黎喇!!

自上次劣食團後，不少友好都話我點解唔預佢，因此小弟決定會安排多一次劣食團Regroup，暫定係再下一個星期期中一日，各位友好有興趣可以o係以下網址揀返邊日得閒，夠六個人就會成行，以最多人去o個定為最終出發日，謝謝。

PS：正如有人所講： 板左板右會食物中毒，但就真係無聽過明漲有o的咩事，所以我相信食明漲係安全o既。

http://bit.ly/201003sushit

近期小弟文章比較多提及”80後”，今次為各位介紹屬於”八十歲後” Clint Eastwood執導新作Invictus “不敗雄心”。

Invictus講述南非前總統曼德拉渡過廿七年牢獄後做總統，及後透過欖球賽去改善種族問題。我個人本身十分喜歡Morgan Freeman這位演員，今次他亦不例外演活了曼德拉這角色。而Clint Eastwood透過麥迪文飾演的欖球隊隊長以及總統身邊的人去讓觀眾可以設身處地去想曼德拉所想，這方面Clint Eastwood處理十分不錯。觀看這部電影時我很感動，曼德拉可能不是一個那麼完美的總統，但曾蔭權肯定是一個不聽民意的特首。

整體電影相當不錯，是本年繼”美食瘋球”後個人認為必看之作，一定好睇過依家上畫幾套大片。入場前最好養足精神，因為Clint Eastwood的電影對白句句精警，絕對不能miss任何一句。如果看過後覺得唔錯可以睇返Clint Eastwood自導自演的Gran Torino “驅逐”，同樣十分精彩。

近排個Blog給予朋友有點政治化，其實我都唔想，不過主流傳媒實在未能表達某些事實，而我堅持的是”說我所相信，寫我心中所想”，但願小弟的”反面邏輯”可以為各位帶來”正面思維”。是時侯回歸自己的Blog….

差不多每年新年過後，腦場定必有一兩間鋪到初七初八都未開，那個時候大家都大概估到是老細走佬，然後EZONE跟PCM腦記又會走去訪問大代(理)有多少損失。這個場面見怪不怪，而往往不消一個月又會有另一家新舖上場。不過今時唔同往日，腦場生意好像越來越差，旺電吉舖很久亦未換上新舖，為什麼會這樣呢？

我記得十幾年前我仲讀緊中學，每日放學都要經旺角轉車，而差不多每日轉車前都會去旺電看一看。一個月四個星期，每個星期五日，當然不可能日日都有東西買，甚或差不多每次都只是Windows Shopping，現在回想起來也覺得自己奇怪，天天都看接近一樣的東西不會悶嗎？

還記得第一次自己儲錢買的Hardware是初中在旺電買，是一台UMAX Scanner，那個超慢，超多網紋的Scanner。買下Scanner後搭巴士回家，因為當年Scanner有點大份所以一上車直接坐在司機位旁邊。坐坐下司機跟我談及電腦的事，就此我便多認識一位電腦玩家(及後他介紹另一位司機給我認識，他閒時會去寫電腦程式，認真估佢唔到!!)。及後當年在newsgroup pc版組團在旺電買Sound Blaster Live再仆去會展排隊換喇叭(那時在newsgroup認識了小巴，在talkonly節目我首次邀請了小巴，及後小巴介紹Q&A跟流料ROY給我認識，所以沒有當年買Sound Blaster Live的話亦未必有今天的talkonly)，間接認識了ANA老闆，而中五畢業時他給了我工作機會，在ANA工作的那一年學到了不少，亦十分感謝Anthony，對我來說他是我恩師。

說了這麼多或多或少各位會明白小弟對旺電莫明奇妙的情意結，腦場黃金時代在於組裝機，後期已經是PDA。現在組裝跟原裝機價格已經很接近，當年硬件速度競賽亦不復再，PDA亦演變至今天的Smartphone，現在消費者比較傾向在大型連鎖店購買電腦或者Smartphone。這些是現在旺電或者腦場死因嗎？是租金太高， 還是腦場已經過氣，是時候轉型？我不知道，但正如早前小弟曾經提及，區議會不要再資助那些根本無需要資助的電腦節，現在電腦節所做的，人家腦場電腦節一樣做到，賣的貨根本就是一__樣，區議會要交功課做政績可以做很多(例如”根dum大賽”)，何必要亂用公帑去跟腦場直接競爭，不要令香港的”大市場小政府”演變成”大市場想小政府”吧。

就算同我唔太熟o既人都知我有兩樣野最怕 – “甲由”同得罪朋友。講到得罪人，其實無咩人可以得罪我，因為我真係唔識去恨一個人。有兩個好好o既例子，第一個係我舊老細，旁人對佢Comment有幾”好”就唔講喇，最少我撞到佢都仲可以同佢Say個Hi(而事實上我同佢又真係無咩野既….)。第二個就係我第一個女友…..

還記得當時同佢斷斷續續同佢一齊o左一個比大家想像中的短更要短o既時間，對我黎講分開之後那段時間真係好痛苦，自己就去文化中心飲悶酒飲到嘔血，同朋友出黎玩又要扮無事。係…….真係好辛苦，但係愛一個人應該係希望佢幸福快樂，我選擇o左祝福佢而唔係恨佢。

因為某些原因，跟ex已經分開了好一陣子，我仲好記得見到佢o個陣佢攬住我，我感覺到胸口濕了。那個畫面對我黎講到依家一樣記憶猷新，每次諗起到好痛。我能夠做o既係唔再傷害我愛同埋愛我o既人。

在那刻，我終於明白hurt人o既痛不下於被人hurt，我並非想合理化自己o既行為(我承認我係一個很差勁的人)，而係近排見到友人因為俾ex hurt然後hurt返ex轉頭。或許感情關係真係無分對錯，但係你hurt我時我hurt返你，究竟幾時先hurt完呢？

“點解係我俾人Hurt? ”

或許人生總要經歷最少俾人Hurt一次，失戀對人的成長一定比唔見”武器”的痛來得健康。就算做唔返朋友都唔好選擇去恨一個人。以下係黃子華棟篤笑講過的：

” 阿甲同阿乙去買魚蛋，阿甲問個老闆：點解阿乙食得咁滋味？老闆反問阿甲：咁你想點丫？阿甲答：我要阿乙同我一齊食得唔滋味o羅!! ” 呢個世界唔係咁運作的，點解唔可以一齊都食得滋味？人可以做的選擇可能真的很少，但至少我們可以選擇去放下仇恨吧？

這一年，曾經以為睇化人和事的我，看到更多人性的黑暗令我看不過眼，看不透，卻開不了口。這一年，一些人讓我看到我六年前曾經有的那團火，他們用行動去告訴我：希望還是有的。這一年，我對”人生”二字有了更多理解。這就是我們剛渡過的2009年。

人生就像一場魔術，看到那些表演當然覺得奇妙，但當你知道魔術背後是怎樣做的就會沒趣 。我覺得自己就像Matrix裡的Neo，不是有他的超能力，而是看到的都是那些Digital Rain，就是社會運作的背後，原來可以這樣黑，這樣暗，而更甚的是我們可以當作不以為然。所以我覺得人可以選擇的話還是不要知太多真相，無知是福。

“呢個世界既人死晒…..錢仲會存在……最後錢會審判呢個世界”，這是電視劇”錢的戰爭”其中一句對白，也是社會的Inconvenient Truth。很多事的根本都是沿於一己利益，究竟利益為何物？人類既生存除左為賺錢供樓以外，還有就是寄望下一代可以活得更好。人終需一死，錢賺盡帶不走，而下一代就是社會的主人翁，究竟有幾多有理會過社會下一代需要的是甚麼？

在聖誕節，劉曉波因為煽動顛覆國家政權而入獄，翌日我們的立法會議員，”法律”學者梁美芬這樣說：

在內地同類案件，通常只判三至五年。她指，外國領事聲援劉曉波，有可能引致當局加重對劉的刑罰，「因為佢（中央）可能更加覺得，其實劉曉波不是劉曉波，而是好多外國勢力在背後，可能造成一些反作用，也不出奇。」(原文)

當”覺得”變成”理所當然”，香港的學者也變得人治，怎能對活在的這個地方不感到失望？

上星期Weekend北上，嘗盡美食佳餚，今天打的上班，下車後環望四周，心裡說了句：都係香港好!然而有多失望，然而在Blog常說移民，但我對香港這個家未敢絕望，至少身邊還有不少友好。我經常在Blog上說我得罪人多(事實亦然)，友人說：得罪人多，但係亦都識到真朋友，除笨有精。我在我要感謝友人們對小弟的容忍，我知我係好難頂，來年希望各位繼續容忍我，一起努力吧。

PS: 嚴格上黎講上面係一o的瑣碎o既廢話，唔係Blog文，當我亂Up就可以，多謝俾面 XD

“你又去台灣拿？唔係下話？” 基本上每次小弟去親台北都好似去走粉咁俾人千夫所指，因為我去親都係去台北，而我又實在太愛台灣這個地方。

台灣人既有善同禮貌去到恐怖既地步，o係香港得返賣香薰既人先有咁既態度。連去七仔買野Cashier既一句謝謝都比香港七仔講o個句多曬來得真心。咁樣講唔係代表香港比台灣差，只係大家生活節奏唔同，社會壓逼令生活本身變成一種壓力。

我唔係旅遊專家，今次唔諗住同各位介紹有咩好食喇，因為我極其量都係叫各位食雞排同棉棉冰。反而想同大家介紹”住”同一個”展覽”。

如果大家同我一樣經常去台北既話，位於西門町既東龍飯店對大家黎講一定唔會陌生。對我黎講最難忘唔係住得有幾舒服，係大堂個阿叔，例必幫你拎行李，例必收貼士，唔俾既話感覺周身唔聚財。今次小第o係TravelZoo搵左間山卡啦黎住。

呢間馥(音復)華商旅係近期翻新過黎，所以門面唔會太差。由於係生日關係，所以揀左最最最豪最重要係間房，呢間酒店係我住過咁多間酒店最滿意，大唔係特別大，不過WIFI，42 LCD TV，DVD幾一應俱全。最過癮係個電視，可以180度由廳轉入房。間房仲有個特長露台，連接住廳到Toilet，可能我住得比較矮，所以無乜境睇。

o係酒店地庫有個酒店級既自助式早餐，旁邊有塊Message Board，大部份人客都係留Message話對間飯店好滿意。的確小弟對上一次住晶華(五星級)都無今次咁滿意，唯獨係交通無咁方便。小弟住o個間房每層有一間，成間飯店有七間，有興趣可以去 http://www.fwhotel.tw 訂房，一晚TW$3,600，相對東龍或者民宿梗係貴啦，但係以近期狂Sell Google Ads既Taipei QUOTE相比呢個價位算唔錯。

另一樣要推介近期台北必去既”景點”，就係Pixar 20年動畫展覽，Pixar將近二十年接近所有動畫既Making of同原稿完整地呈現觀眾眼前。呢個巡迴展覽由即日起到十一月一日o係臺北市立美術館舉行，唔好以為藝術野無乜人睇，當日小弟去到排左差唔多成粒鐘，唔想排隊的話小弟建議星期六夜晚六點打後去(星期六收八點半)，門票於便利點有售，但建議即場買飛，因為現場賣既係特別版門票，可以考慮一下收藏。整體黎講都幾多野睇，加上已知香港唔會搞，作為Pixar粉絲我諗呢個展覽無得唔去喇。還有場外場內都有Pixar記念品賣，小弟特別推介Pixar既Yoyo卡(即台北八達通)，WALLE套裝十分讚!!

有時候有o的野送俾你都未必人人爭住要。

還記得小弟第一次去亞洲國際博覽館係睇某國際巨星既演唱會，我對o個位國際巨星興趣其實唔大，當日仲買定飛o係奧海城睇Rocky Balboa準備入場，突然收到料有免費飛派先入去叫做見識下國際巨星，最估唔到係有免費飛入到去都係得七八成滿，一熄燈渣平飛既成棚人衝左落貴飛位度(因為貴飛位大部份都係吉)，搞到遲到又買左貴飛既要搵埋”實Q”同渣平飛o個班人講數俾個位佢地攝下，呢個咁難忘既奇景我都依家都好記得。

今次情況都好類似，我原本對Summer Pop Live都唔係好感興趣，雖然話有小弟最喜歡既五月天，不過如果唱得兩三首首歌就無咩吸引力喇。點知晏晝突然收到友人電話問我一舊水張飛有無興趣去睇，最後我真係過左博覽館睇(張飛係五舊水貴飛黎)。睇到夜晚八點鬆少少，五月天一出場，大半場都渣住藍色螢光棒就知道…..粗略估計最少三成人係五迷，唱到劉美君已經有唔少人開始散水，壓軸既黎明緊緊Keep到現場過半入座率。小弟眼見出口有大大條Banner寫住”人潮管制”，我心諗：從劉美君出場時間我已經覺得個Show既Run Down已經係最好既”人潮管制”。個演唱會十一點完，將黎明放壓軸五月天放咁早未面太睇少五月天，當然從觀眾角度個Rundown絕對係方便我早走，但作為納稅人我覺得多多少少都要俾o的意見，因為今次Summer Pop Live係旅發局贊助。

o係我圈子裡面已經最少有三個朋友有識人有Summer Pop Live既免費飛，門券極有可能滯銷。根據六月份新聞顯示，Summer Pop Live應該係佔用整個Arena場館連續兩日共提供二萬五千張門票，但事實上尾場只係開左半個館(頭場無睇唔肯定)，所以一定無可能有二萬五千張門票，再翻查近日新聞先知道最後原來每場門票只係得七千張，七千張都唔滿之餘，場館外仲有成班著晒老西既人幫旅客做問卷(唔講以為附近有新樓盤)，驟眼睇落去佢地真係無咩做，Summer Pop Live對旅客的吸引力我係抱懷疑態度。

整體我覺得個演唱會係搞得唔錯，小弟用一舊水睇足大半日直情係抵啦。但係在此我想提出兩個問題：1)係咪宣傳可以好o的避免場面咁冷淡？2) 總所周知依家本地歌手做唱片其實無肉食，賺錢主要都係靠搞”週邊”，尤其係演唱會。我真係諗唔明點解旅發局會劈頭話唔包底，佢地有無諗過點解”通常賺錢”既演唱會經佢地手會變左”我地唔包底架”？其實旅發局應該考慮宣傳下既有既活動，好似同期同類音樂節Green Live，總好過依家唔知點咁。

如何分辨職業歌迷

因為上星期係單一個SHOW見到咁多演出單位既歌迷，有個小觀察想同大家分享。(以下純粹個人理解) 一) 理論上歌迷應該係會喪Loop偶像o的歌，但係如果大家發現一大班”歌迷”跟住偶像唱Chorus但係只係識嗌唔識唱，咁佢地就好大機會係職業歌迷。二) 大家睇緊Show好近o的歌迷，不妨留意佢地舉o個o的牌背面，如果見到貼住張歌詞貓紙，亦都極有可能係職業歌迷。當然歌迷都有可能唔識偶像既歌點唱又唔記得歌詞既………咁就我錯o羅 XDDDD

臨近放榜，宣傳得最勁o既唔係教育局，唔係考評局，而係IVE同各大補習社集團。其中最為出位o既廣告係我尋日不斷o係電台聽到既活學教育廣告，內容大致係：”唔搵Miss Tann補英文，會考拎U都唔抵可憐”，我想講呢o的廣告真係邊叉個諗出黎，人地唔搵你就唔抵可憐，未免自視過高兼且唔多尊重其他會考生吧？

香港社會的確很虛偽，這邊廂電視鏡頭紛紛報導10A狀元有幾勁，那邊廂會考26分既森美同你講佢自己都唔係咁高分，分數唔代表一切，你信唔信？事實係：如果分數係呢個社會唔係咁重要，就唔會有咁多學生走去幫襯補習社，香港就唔會有補習天皇天后存在。會考高分既相信都唔駛o係度點講，至於低分的話小弟有些事可以跟你們分享。

我諗唔係我自己講出來的話，應該無咩人會信。小弟會考分數係極低，極低,  極低。我唔會話自己唔係讀書材料，不過無乜興趣讀書係真。所以我無選擇重讀，反而讀左個Dip，之後做過一年腦場，一年Office。最後因為考Dip同頂唔順舊老細二手煙Quit左份工，自己開左間公司出黎。原本諗住只係當Part Time，真係無估到會做到今時今日 (詳見 You see me good, I see you good! (2))。公司初期出技術困難有些時候都是找朋友幫手，但係搵唔到人幫手自己又搞唔掂既時候只有一個解決方法 – 點都要死掂佢。我唔會話自己係會考低能兒既成功代表，但至少有一家屬於自己o既公司，不愁食衣住行。我唔會Proud of我自己會考極低分，不過我諗我算係可以代表會考低分唔等於完全無前途，最緊要係要知道自己想做咩。了解自己想做的唔係掂硬，不過唔了解自己想做的就死硬，俾你U grad出黎都好難o係呢個社會生存。

小弟好鍾意去唔同戲院睇戲，因為咁樣可以比較唔同戲院坐位同影音效果，當年遠至數碼港，近至The Grand Cinema我都係第一時間入去”試睇”。就小弟多年睇戲經驗，港威算係數一數二唔掂o既戲院，不過正所謂一山還有一山低，小弟終於見識到真係垃圾戲院。

話說小弟尋晚去完昂平360 o係東薈城UA睇七點七o個場葉問，應該係假期關係，全場八九成滿，我坐o係約尾五尾六行。一坐o係度就發現前面o個個人個頭遮住個銀幕1/3咁濟，我唯有打側個頭黎睇。初頭以為係自己問題，後來發現隔離o個個男仔都係打側。事實上現時一般樓底唔夠高或者唔夠斜既戲院都會安排一行座位靠左，一行座位靠右這樣梅花間竹避免前面觀眾會阻檔後面觀眾視線，無獨有偶沙田UA都有類似問題但可能銀幕較高感覺上無咁嚴重，不過東薈城UA只有中前排採用這類梅花間竹安排，中後排全部係頭擋頭。如果第十一行觀眾因為第十行觀眾阻擋視線而顎高頭，如似類推最後o個行o既觀眾應該要企起身先睇到。這是我人生第一次睇戲見到有觀眾因為睇唔到銀幕而o係電影開始時間不斷調位以求能夠看到銀幕。而我得出o既結論係：你要確保能夠看到一個長方形o既銀幕而唔係好似一舊芝士俾老鼠咬咁幾忽o既話，兩個人去睇最好買埋前面o個兩個位，如果你係有良心可以買埋後面兩個位避免有人買左後面而因為你個頭擋住睇唔到銀幕。

我個人認為，一間戲院最低要求係：完整睇到銀幕。根據Wiki資料顯示，東薈城UA開業八年，算比較新一批電影院，設計竟然如似不知所謂。坦白講，今時今日The Grand Cinema同Palace IFC票價並非貴UA好多，UA真係要好好檢討下戲院設計。如此戲院，對觀眾不尊重，更甚是對電影不專重，葉問一部好電影就這樣被糟撻。

小弟鍾意食，早前為各位介紹過青衣的車仔檔，相信已經成為集體回憶。記得好多青衣朋友都話以前車仔檔開到兩三點，三五知己買完大包細包車仔美食，從長發村行出海旁，食住碗仔翅吹水，入OK再買兩支酒把酒言歡。成日話香港人食得講究，所謂講究未必係指一定要魚翅啷口，餐餐飽魚，其實食得開心同食得豪華完全無關係。小弟試過食一餐每位幾百蚊既法國餐，份量之多唔知邊個可以食得飽，最後食o左個麥記做宵夜，此時此刻，麥記既薯條都可以好好食。

我不時o係度諗，其實點解香港唔可以有類似台北夜市？香港特色街頭小食實在太多，我建議政府於各區選址並重發類似流動小販牌照俾車仔檔可以係指定地方經營，此舉可以為車仔檔主幫補家計，亦為市民提供多一個廉價選擇甚或成為旅遊景點。當局亦可以考慮為車仔檔提供或資助購買較安全之器材。

其實政府一直都有做類似的項目，但通常最後都唔理想。我認為很多時政府政策的無心插柳都會帶出一個給人奇怪的感覺：以前唔好既野無左，以前好既野都無左，現在o既野差左。政府好應該參考昂平市集這個反面教材，所謂特色商鋪，講穿左其實只係主題K房 – 換湯不換藥，整到古色古鄉懶古舊，其實入面都係Starbucks。我認為類似青衣海濱長廊是很有潛力做夜市，以地區居民需要以設立的夜市，政府只要肯開綠燈，我相信所需公帑很少，不過卻可以幫到不少人。