“你又去台灣拿？唔係下話？” 基本上每次小弟去親台北都好似去走粉咁俾人千夫所指，因為我去親都係去台北，而我又實在太愛台灣這個地方。
台灣人既有善同禮貌去到恐怖既地步，o係香港得返賣香薰既人先有咁既態度。連去七仔買野Cashier既一句謝謝都比香港七仔講o個句多曬來得真心。咁樣講唔係代表香港比台灣差，只係大家生活節奏唔同，社會壓逼令生活本身變成一種壓力。
我唔係旅遊專家，今次唔諗住同各位介紹有咩好食喇，因為我極其量都係叫各位食雞排同棉棉冰。反而想同大家介紹”住”同一個”展覽”。
如果大家同我一樣經常去台北既話，位於西門町既東龍飯店對大家黎講一定唔會陌生。對我黎講最難忘唔係住得有幾舒服，係大堂個阿叔，例必幫你拎行李，例必收貼士，唔俾既話感覺周身唔聚財。今次小第o係TravelZoo搵左間山卡啦黎住。
呢間馥(音復)華商旅係近期翻新過黎，所以門面唔會太差。由於係生日關係，所以揀左最最最豪最重要係間房，呢間酒店係我住過咁多間酒店最滿意，大唔係特別大，不過WIFI，42 LCD TV，DVD幾一應俱全。最過癮係個電視，可以180度由廳轉入房。間房仲有個特長露台，連接住廳到Toilet，可能我住得比較矮，所以無乜境睇。
o係酒店地庫有個酒店級既自助式早餐，旁邊有塊Message Board，大部份人客都係留Message話對間飯店好滿意。的確小弟對上一次住晶華(五星級)都無今次咁滿意，唯獨係交通無咁方便。小弟住o個間房每層有一間，成間飯店有七間，有興趣可以去 http://www.fwhotel.tw 訂房，一晚TW$3,600，相對東龍或者民宿梗係貴啦，但係以近期狂Sell Google Ads既Taipei QUOTE相比呢個價位算唔錯。
另一樣要推介近期台北必去既”景點”，就係Pixar 20年動畫展覽，Pixar將近二十年接近所有動畫既Making of同原稿完整地呈現觀眾眼前。呢個巡迴展覽由即日起到十一月一日o係臺北市立美術館舉行，唔好以為藝術野無乜人睇，當日小弟去到排左差唔多成粒鐘，唔想排隊的話小弟建議星期六夜晚六點打後去(星期六收八點半)，門票於便利點有售，但建議即場買飛，因為現場賣既係特別版門票，可以考慮一下收藏。整體黎講都幾多野睇，加上已知香港唔會搞，作為Pixar粉絲我諗呢個展覽無得唔去喇。還有場外場內都有Pixar記念品賣，小弟特別推介Pixar既Yoyo卡(即台北八達通)，WALLE套裝十分讚!!
佢未必係o係紅館場內賺最多錢既藝人，不過一定係紅館場外賺最多錢既藝人。三舊水環保袋，兩舊水T Shirt，貴嗎？即管小吧!!因為未到尾場已經賣__晒，佢係林海峰，七場門票閃電式爆滿，有咩咁好睇？
To be fair，以我買HK$200飛有坐得幾錢(再加上無乜期望)黎講，o係紅館渡過呢兩個鐘有得笑下都幾好，今次都有75分喇。林狗開始搞下台上台下互動，比較有意思既結尾(我指talkshow部份)，越來越有黃子華式棟篤笑影子。不過我覺得將林狗同子華比未免唔太公平，因為層次真的有別。黃子華棟篤笑當中既哲理(無錯，條友真係讀哲學)，精準既笑位，內容既前瞻性，真係唔係人人做得到。
林狗式棟篤笑除左記念品外，其中一大特色就係笑位未必多，但係總有一少段能夠做到noise，今次都唔少得。不過有好幾個”位”佢講左句：你地係咪夾定唔拍手架？如果佢真係覺得係”笑位”既話真係唔好意思，未免太弱吧？如果用佢o個句野諗住打完場亦未免太突核吧？希望佢真係特登度個唔好笑既gag黎配合佢o個句”你地係咪夾定唔拍手架”。
買記念品須知
另外想講一下記念品，小弟無意阻止各位購買記念品，因為小弟都係o的喪買演唱會記念品既人，不過有些少經驗可以同大家分享。
當你覺得o的記念品真係好靚好想買之際，買前一定要先問自己買黎記念定係真係有用(記念的話即管買吧!!)。買Poster的話先問自己買左返去會打開佢還是呢世都係捲埋佢。買Tee的話記念(即係唔著)還可，真係著的話最好預算下著幾多次，因為通常演唱會o的限定Special Tee真係Special易”where”，幾個月前我睇某位歌手既演唱會我見到好多歌迷著左上年同一位歌手演唱會既主題tee，近睇其實佢地成班好似著緊”地拖”咁。諗住著好多次既話最忌就係件tee寫齊年月日，從潮流角度黎講未免唔太襟著，與其買一件份份鐘貴過ixxue但係用料比ixxue更差既”地拖”，大家不妨考慮下將o的錢捐左佢。
紅磡小食記
通常去得紅館睇show，附近唔係o係火車站食就係o係都會食，尋晚小弟就去左都會食Food Court，基本上我去親呢個Food Court都無咩好下場，今次都唔例外，食左個海南雞餐。
只能夠講句，如果我NetBugs今日死左，咁呢隻海南雞就係我呢世人食過最鞋既海南雞，我死得最唔甘心係，我無諗過海南雞咁穩陣都會出事家麻!! 我見Food Court附近有o的吉鋪，我認真建議波仔或者合味道可以o係o個度開餐廳，唔愁無生意。
正所謂大難不死，必有後福，今次仍然都唔例外。小弟去左新開左一排既媽咪雞蛋仔，平時用可可粉溝蛋槳既啡食朱古力味雞蛋仔就食得多，媽咪雞蛋仔真係落朱古力落去，咬開粒雞蛋仔會好似真係有朱古力餡咁，值得一試，一底HK$12。我預期呢間野好快會o係Openrice上位，要食就快喇。
Openrice食評
NetBugs美食版圖(Google Map)
在較大的地圖上查看NetBugs 美食版圖
十四歲教科書，熊澤老師話長大就係：黑色唔可以話係黑色，白色唔可以話係白色。
我所認知既長大係：有o個句唔可以講o個句，呢個世界無對錯，只有既得利益，歷史都要改變。
可能我講既野無人會明，好抽像……其實我都唔係好明。點解政府拍咁多廣告叫人唔好吸煙，又擴大禁煙範圍，但係又繼續俾可以賣煙？點解馬會開賭，又同時撥款幫人戒賭呢？呢個社會對我黎講真係好奇怪。
我提出咁多奇怪既點解源於”林兆鑫事件“，我唔係明光社人，無道德光環，我接受坦白從寬，不過呢條友竟然企圖掩飾失當，我諗唔到點樣可以原諒呢個人，而最後法庭亦判囚廿五個月，奇就奇在好多達官貴人都有寫求情信幫佢。難道現實社會就好似學校那樣，可以用優點抵消缺點？如果係咁究竟做幾多件好事先可以抵消一件壞事？
熊澤老師續說：如果長大就係這樣，咁我寧願我個女唔會長大。
Recent Comments