自小弟有生以來，日版白色巨塔係我睇過最好睇既電視劇，劇集當中既醫療訴訟並非好人與壞人之對決，而係社會正面與陰暗面之對決，劇集呈現唔少現實社會既問題，沉重慘勝既結局帶來唔少反思。黃子華套劇唔駛我推介大家都會睇，所以今次為各位介紹o的無乜人睇既，分別係一部劇集同一部真人騷但內容同樣以社會陰暗面出發。
十四歲的教課書 – 逢星期日深夜十二點四十五分無記翡翠台
無記重播呢套劇(首播o係收費劇集台)本應係唔錯，不過一晚播兩集實在太Heavy，部劇要思考既地方太多。故事類似白色巨塔以訴訟作為主軸，不過今次係校園欺淩訴訟。男主角係電車男伊藤淳史，雖然日本本土收視麻麻，不過內容好值得深思，值得一看。
窮富翁大作戰 – 逢星期六晚亞記本港台七點 (RTHK官網)
靠努力係咪真係脫離貧困？港台搵左幾個生活無憂既有錢人要佢地去體驗貧困生活，雖然話條橋唔係佢第一個發明，不過我十分欣賞港台肯試做呢o的節目，點都好過睇唔知邊個大明星指住o的窮人大聲疾呼講句：嘩!!你真係好慘喎!!講一句”你好慘”，人人都識，但係你能夠體會嗎？ 一百萬人的故事，我同你知，天知地知政府知，只係o係呢o的moment政府就會教大家從”好”o個方面睇。真正既幫助唔係買隻LCD俾佢地，唔係俾一千幾百佢地，而係製造”靠努力可以脫離貧困”既環境，這個才是政府同社會既責任所在。
小弟在Google “窮富翁大作戰”的時侯，看到了這個Blog，其中一段是這樣的：
“這節目令我回想起一天到中環揼骨，幫我按摩的師傅是位年約40，來自大陸的女士。她告訴我來到香港的生活很苦，嫁個老公又不是自己喜歡的….如 果唔係我怕佢揼死我，我真係想丙佢一鑊。她嫁這個老公時又不是不知道他已經幾十歲，唔死都得番半條人命，冇錢仲要生個仔，個仔唔做乞丐仲可以做咩? 香港中產有少少錢，都左諗又諗要不要下一代，怕自己沒能力供養子女。我覺得要滅貧，首先一定要控制人口。
有一次到大陸工作，一位大陸朋友說：「南京大屠殺死了那麼多人 ，為什麼中國還有十四億人… ?哈哈」”
我唔敢Judge佢既諗法係有問題，因為好多香港人都會有佢呢種思維，我亦唔敢話我無咁諗過，我地生於香港住o係香港咁多年渣住香港身份証當然對香港無乜Fantasy，不過對內地部份同胞黎講香港仍然係好吸引(從早前香港機場航班延誤有內地旅客鬧爆”現在香港跟大陸一樣了”便可略知一二)。依家去批評這些內地來港同胞係一件幾咁容易既事，事情發生左，我地係咪應該諗下點幫助新移民，繼而話俾o的想申請單程証既內地朋友知What is Real Hong Kong呢(雖然都係無咩可能)？
有時候有o的野送俾你都未必人人爭住要。
還記得小弟第一次去亞洲國際博覽館係睇某國際巨星既演唱會，我對o個位國際巨星興趣其實唔大，當日仲買定飛o係奧海城睇Rocky Balboa準備入場，突然收到料有免費飛派先入去叫做見識下國際巨星，最估唔到係有免費飛入到去都係得七八成滿，一熄燈渣平飛既成棚人衝左落貴飛位度(因為貴飛位大部份都係吉)，搞到遲到又買左貴飛既要搵埋”實Q”同渣平飛o個班人講數俾個位佢地攝下，呢個咁難忘既奇景我都依家都好記得。
今次情況都好類似，我原本對Summer Pop Live都唔係好感興趣，雖然話有小弟最喜歡既五月天，不過如果唱得兩三首首歌就無咩吸引力喇。點知晏晝突然收到友人電話問我一舊水張飛有無興趣去睇，最後我真係過左博覽館睇(張飛係五舊水貴飛黎)。睇到夜晚八點鬆少少，五月天一出場，大半場都渣住藍色螢光棒就知道…..粗略估計最少三成人係五迷，唱到劉美君已經有唔少人開始散水，壓軸既黎明緊緊Keep到現場過半入座率。小弟眼見出口有大大條Banner寫住”人潮管制”，我心諗：從劉美君出場時間我已經覺得個Show既Run Down已經係最好既”人潮管制”。個演唱會十一點完，將黎明放壓軸五月天放咁早未面太睇少五月天，當然從觀眾角度個Rundown絕對係方便我早走，但作為納稅人我覺得多多少少都要俾o的意見，因為今次Summer Pop Live係旅發局贊助。
o係我圈子裡面已經最少有三個朋友有識人有Summer Pop Live既免費飛，門券極有可能滯銷。根據六月份新聞顯示，Summer Pop Live應該係佔用整個Arena場館連續兩日共提供二萬五千張門票，但事實上尾場只係開左半個館(頭場無睇唔肯定)，所以一定無可能有二萬五千張門票，再翻查近日新聞先知道最後原來每場門票只係得七千張，七千張都唔滿之餘，場館外仲有成班著晒老西既人幫旅客做問卷(唔講以為附近有新樓盤)，驟眼睇落去佢地真係無咩做，Summer Pop Live對旅客的吸引力我係抱懷疑態度。
整體我覺得個演唱會係搞得唔錯，小弟用一舊水睇足大半日直情係抵啦。但係在此我想提出兩個問題：1)係咪宣傳可以好o的避免場面咁冷淡？2) 總所周知依家本地歌手做唱片其實無肉食，賺錢主要都係靠搞”週邊”，尤其係演唱會。我真係諗唔明點解旅發局會劈頭話唔包底，佢地有無諗過點解”通常賺錢”既演唱會經佢地手會變左”我地唔包底架”？其實旅發局應該考慮宣傳下既有既活動，好似同期同類音樂節Green Live，總好過依家唔知點咁。
如何分辨職業歌迷
因為上星期係單一個SHOW見到咁多演出單位既歌迷，有個小觀察想同大家分享。(以下純粹個人理解) 一) 理論上歌迷應該係會喪Loop偶像o的歌，但係如果大家發現一大班”歌迷”跟住偶像唱Chorus但係只係識嗌唔識唱，咁佢地就好大機會係職業歌迷。二) 大家睇緊Show好近o的歌迷，不妨留意佢地舉o個o的牌背面，如果見到貼住張歌詞貓紙，亦都極有可能係職業歌迷。當然歌迷都有可能唔識偶像既歌點唱又唔記得歌詞既………咁就我錯o羅 XDDDD
近年香港多左好多美式Burger店，Burger King, Triple O等等，其中Triple O既Mushroom Burger係小弟至愛，不過真係好易食到濟。各位留意，飽同濟係唔同既，前者係滿足，後者係一邊食一邊涯，Triple O老實講真係一點濟。而今晚小弟食既係威靈頓街既Pro Burger，我覺得係堅滿足，漢堡扒幾Juicy，薯角洋葱圈都係熱辣辣(我諗佢o的薯角擺嚮度兩個鐘都熱過你岩岩o係麥記買返黎o個o的)。鋪頭得幾個坐位，有得揀既最好拎就食喇。
Openrice食評
NetBugs美食版圖(Google Map)
(電影門票仍在百老匯IFC, 電影中心及AMC又一城有售。)
電影橋段通常都是這樣的：好人對壞人，壞人最後被好人殺死了。其實人生怎會是這樣非黑即白呢？有時看這樣的電影太多都沒有感覺，是晚忙裡偷閒，於Palace IFC欣賞了”音樂人生”這部記錄片(其實唔算”忙裡偷閒”，因為我早了近一個月訂飛，實在太多人看，卻太少場次)，該片給觀眾思考空間很大。
下段文字包含該片少量內容
然而該片名稱叫”音樂人生”，然而”主角”黃家正在片中講述音樂對他人生的重要性，但實情是人生大於音樂，音樂只是為貫穿整條記錄片。我對KJ的音樂才華不感好奇，這個世界的天才實在太多了，我驚奇的是但他從11歲已經提出為甚麼人會存在，我感覺到KJ對人生的不滿意，我感覺到他的人生之只能寄情於音樂，KJ的人生是只有音樂還是只能有音樂？
我十分欣賞KJ強調的Human Being，那些道理現在大部份成年人都可能遺忘。每一個人都應該認清每一件事的本質，否則事便會變得沒意思，人生便沒有了Human Being。有些觀眾看畢該片覺得KJ幸運，幸運在生於富裕家庭，幸運在有一個很好的啟蒙老師。我看畢該片卻覺得自己比他幸運，因為我人生能夠選擇的比他多。
如果大家平時都係周圍食野既話，唔難發現唔少著名食府門面當眼位置都會有”蔡瀾常去食肆150間之一”既大大招紙，招紙作用其實同元朗教育路成條街o的食店差唔多都有滔滔張相既道理一樣，當然係想吸引食客話俾你地知我間鋪有幾咁巴之閉。更巴之閉係，”蔡瀾常去食肆150間”呢本書太好賣，再版已經Upgrade左做”蔡瀾常去食肆160間”。小弟腦海突然浮現出一個問題：何謂”常去”？假設一個月去一次為之”常去”，160間食店一年各去十二次，每次為之一餐的話一年就要食一千九百二十餐，平均每日要食5.26餐。本書係滔滔出既話，我信。蔡瀾一日食唔食到5.26餐，各位自己判斷吧!
小弟無意對才子作出挑戰，更無意質疑佢話好食既野係咪真係咁好食，小弟鍾愛既大家食同聯記都在蔡先生”常去”之列，不過”常去”呢o的字眼未免唔係太適合吧？
Recent Comments