好多人覺得我對iPhone有偏愛，我唔敢講我唔係，不過要小既野一定照小。
iPhone OS 3.0推出後，我諗比較觸目非PUSH功能莫屬，現時IM+同Beejive都可以提供PUSH通知功能，即係話有MSN Message就算你部機無開佢都會好似SMS咁Alert你。Session Timeout(即係話過左呢段時間唔入App你個MSN就會Offline兼睇唔返之前既Message)，Beejive 最多可以保留24小時，IM+聲稱可以留三日添，不過測試之下IM+其實過左十幾個鍾已經唔識再PUSH。初步意見係：Beejive介面夠快同簡潔，IM+勝在可以PUSH有Mention你或者DM你既Twitter Message，所以如果買齊兩個App用Beejive MSN同IM+ Twitter就一流喇。(兩個Client都兼容其他IM，自己上App Store睇啦)。
不過咁有個問題，如果PUSH Alert超過一個，你永遠只能睇最新一個，對上一個就會唔見左，我真係發夢都諗唔到呢o的低能野會o係Apple度發生。Apple好應該學下Android咁可以有UI睇返PUSH Alert，我絕對唔同意呢個係Additional Feature，呢個明顯係Serious defect。
人永遠都想避免唔開心，但就如死亡一樣，其實是不可能避免的。
昨晚從友人天水圍家駕車到灣仔工作，聽到903的”妹妹妹妹”節目，主持說：凡事作最壞打算，到了最壞的時侯便會感覺沒那麼壞。我認為這個說法只能說對了一半，食物要嘗盡甜酸苦辣，有悲有喜的才算完整人生吧？不開心的事候，先感受而後面對，人不就是這樣成長的嗎？
“凡事作最壞打算”的人生過於悲觀喇，唔開心既事點解唔可以唔開心？懂得自我復原就可以了。
陳奕迅 – 開不了心
一想起再累也是要做人 我的思緒便繃緊
誰又要大家比我還擔心 胡亂地鼓勵人
一想起往日某段抱憾 不要用笑話迫我暫時興奮
難道怕我一不快便輕生 輪流伴我談心 放心
不開心就不開心 也別勉強的慰問
但求隨著我的心 灑脫地尊重我的傷感
別要 不開心便找開心 去避過我的良心
消化憂鬱後 才令我拾回自信心
一想起戰亂破壞了文明 我怎可以沒知覺
告訴我幸好這裡沒飢荒 難道便可快樂
一想起我們有話要講 未曾被聽見便閉幕
猶幸我愛惜這個地方 仍然盛放
不開心就不開心 也別勉強的慰問
但求隨著我的心 灑脫地尊重我的傷感
別要 不開心便找開心 去避過我的良心
消化憂鬱後 才令我拾回自信心
不開心便找醫生 吃藥吃到不會恨
但求藍調更興奮 迫我大笑情況更傷感
不開心未必不堪 快樂也要找原因
一瞬間低落 然後我自然又再生
最後塵埃跌定 我便會翻生
能夠蓋過新聞的就只有新聞，我們不會留意劉曉波被捕，但會留意陳振聰憶述如何跟龔如心挖洞。我們不會留意Farrah Fawcett的離逝，但會留意Michael Jackson逝世的新聞，傳媒的作業模式就是這樣。正生書院搬遷事件已過了接近三星期，大家好像會逐漸遺忘這單新聞，就好像早前我們會因為掉鏹水事件避免去MK，但幾星期後我們的結論是：MK must go on。
回望過去幾星期的新聞，梅窩居民受全香港千夫所指。請恕小弟主觀地說，梅窩居民有其訴求可以理解，但不代表可以不尊重正生學生。屯門有中學生在學校附近屋苑索K，上水有中學生在學校附近屋苑索K，為何要沒有K索的正生書院遠離民居？
這個風波對香港來說還是有得著的，至少大家知道正生書院存在，吸毒越來越普遍是根本事實，傳統中華民族的隱惡揚善的陋習只會令問題惡性循環。
我不明白為何政府最初無人抨擊梅窩居民的言論，尤其某位女士說：正生書院應該遠離民居。陶傑有一句說話很有道理，現在是驚人治港，樣樣都驚，點可以管理香港？請恕小弟對現行政策之膚淺，我認為政府可以考慮中小學進行每年一次的強制性保健計劃，並且將驗毒納入保健計劃其中一環，這樣可以有效避免標籤問題。政府現在方向是打擊青少年濫藥，我不夠膽說這是錯的，不過更重要的方向應該是從家庭著手，大部份濫藥的青少年都跟家庭背景有關，解決青少年濫藥，而不解決家庭問題，結果青少年還是去濫藥或者做其他不正當的事。
成件事最抵鬧係政府，諗住可以拍拍PAT PAT俾居民同正生自生自滅，佢地好似唔會諗到件事茅頭最終會指向政府自己，點解我地個政府既官員咁醒目嫁？
寫blog之時正值talkonly直播之時，我唔係multi tasking一邊做節目一邊寫blog，而係因為”講錯野”暫時我打算唔會再做talkonly。說坦白，我並唔係大家想像中那麼樂觀，唔做talkonly係千百萬個唔願意唔開心。唔開心並唔係因為talkonly其他主持的冷嘲熱諷，說笑的我沒所謂亦受得起，真的冷嘲熱諷，我受不了。我敢以性命擔保我是基於道歉而退出talkonly，亦都係為了維護talkonly，出事之後我有跟朋友們提及過，但從來沒有說過是誰令我退出。talkonly對我黎講跟屋企人，事業，愛情，友情並列同樣重要。今次的代價奪了我半條命，代價是很大，不是值不值得，而是我覺得有需要。坐在公司聽他們做節目好像度日如年，今晚好像窒了息一樣…….
你可以話我抵死，你可以話我終於有今日，但請不要問我有甚麼企圖…..
因為我沒有甚麼企圖，Please respect me。
因為阿Sir的懷疑，小弟回想起我的不傳奇創業故事，借機和大家分享一下順便為這個我在節目講過N次的故仔做一次筆錄。
還記得小弟現在公司做的曾經建議舊老闆做，不過佢又無點理我，後來因為考試所以無做舊公司(其實係因為頂唔順老板o的二手煙同OT)，所以考完試後決定自己開公司做這一行生意。我十分之記得未正式開公司之前我約過兩位朋友Q&A同流料ROY徵詢意見以及有無興趣入股(即係問佢地借錢)，當時Q&A無咩特別意見，而流料ROY唔單止覺得做唔過，仲同我講：不如我打本俾你做過第二樣，你呢o的做唔過!! 流料ROY係我一生人裡面其中一個非常重要既朋友，當時我對佢既講法真係幾無癮。最後我用左自己僅餘不到兩萬的資金創立左呢間公司，你無睇錯，係兩萬都無。當時自己諗住當Part Time，然後再找Full Time做或者繼續讀書，從沒有想過可以發展到今時今日咁既公司。
多得友人幫助，當年用左一個十分平既價錢放左公司第一台Server上Data Center，不過話說回來，現在Data Center租金跟幾年前增幅近100%，慶幸我們公司有返咁上下客量，不然其實好難做得住。雖然公司站得住腳，不過我知道一旦Data Center進一步喪加租既話情況就可能有變，所以我一直積極諗緊搞一o的新服務，另外亦有諗有無其他生意可以做(識得我既應該朋友都應該知道我想開餐廳吧?)，O記阿Sir話”你地都幾好搵”其實我心裡十分無奈。
到呢一刻為止，我唔知那個搞到我一身蟻既客有無犯法，不過好老實，對我黎講，佢係一個”好客”，因為佢準時交錢。前排有兩個教會客，兩個都不約而同拖數，一個唔交錢幾個月，一個同我地講”數期”，前者因為欠款被戶口被停仲可以大大聲鬧我地，後者更加係大大大教會，我地唔係收緊你幾十萬，只係幾舊水，呢件事令我對教會感覺十分負面，佢地好應該向呢o的搞甜網既好好學習。
小弟上星期日晚訂左位同屋企人去荃灣小肥羊食火鍋，原本諗住同阿公慶父親節，點知一肚氣……..
因為荃灣附近塞車，我打去問可唔可以留多幾分鐘，個Staff用極度惡劣既態度同我講：講左六點半前唔到就唔等架啦!! 好似我殺左佢阿媽定阿爸咁。都唔緊要，入到去竟然係坐o係一間激細房。都唔緊要，但係我勢估唔到間激細房可以坐到四圍檯，加埋坐17個人，都唔緊要，但係連送餐個阿嬸都話：咁逼，點行過去呀？你無位既我唔介意你話無位，咁樣迫埋一間房真係搵黎搞。贏左錢，輸左形像，其他酒樓應該當反面教材引以為鑒。
話說小弟上星期六到Elements睇極速緋聞，我在排隊入場時，前面有個男人渣住杯相信係Starbucks既飲料入場，職員上前攔截，同個男人講：麻煩先生飲完杯咖啡先入場。那個男人說：我入去廁所者，然後繼續向前衝。硬衝幾次不遂後個男人話：咁我擺底先喇 (即係唔會返黎拎)，然後我聽到佢話：抵佢一世做收飛仔!! 我聽到之後擰晒頭，佢再重覆一次”抵佢一世做收飛仔!!”我今次怒啤佢，佢好似不以為然。
講真，o係出面帶野食同野飲你同我都試過，通常入場o個下見唔到就當隻眼開隻眼閉，咁明目張膽渣住杯Starbucks入去人地查你係職責所在，家下你唔岩仲要鬧人，無__野下話?! 再者做收飛有咩問題？o係資本主義社會裡面階級觀念無可避免，但唔代表可以唔尊重職業比你低微o既人，麥記唔可以無收銀，百老匯唔可以無Sales，呢個社會入面任何職業都應該得到尊重，人同人互相尊重呢o的基本都唔識既唔該你唔好做人。我唔會尊重唔識尊重人既人，但願你無仔女送終以免教壞下一代，呢o的咁既人就算有幾百億身家都會得到人地既尊重。
我想o係度同當日o個位收飛既The Grand Cinema員工講句對唔住，我真係好後悔o個日無幫你鬧爆o個條茂利。
小弟曾經提出過”鋁窗效應”理論，意指當新聞對鋁窗跌落街作出報導之後，那段時間會不斷有其他鋁窗跌落街，想不到這個理論在小弟身上應驗。前星期收律師信，上星期上差館落口供，前幾天有O記走上門”套料”，壞事總是接二連三。
說坦白，因為公司客戶群的確包羅萬有，難免有些”特別”的客戶，所以跟海關，商業罪案調查科都有”交過手”，通常都是交代客戶資料而已，O記是第一次接觸。O記即是OCTB (Organised Crime And Triad Bureau) ，中文是”有組織罪案及三合會調查科”，他們在調查使用我們公司服務的其中一成人網站，其實在我們角度停了那個客便一了百了，不過並不是想像中咁簡單。
在跟阿Sir言談中我發現O記不單有調查那個客，連我也被起底，我相信他們有查過我的銀行戶口，連有沒有女朋友都知道，所以我很懷疑他們有沒有跟縱過我。還記得阿Sir問我：”你開左間公司短短幾年，都幾好搵架喎!!銀行戶口有咁多………”。以我公司資本來說只能說健康，談不上”好有”。阿Sir言談很禮貌，不過可能言者無心，聽者有意，我覺得阿Sir懷疑我公司的收入來源。說真的，公司結存可以在沒有收入情況下維持最少兩年開支很正常吧？為了那個一個月賺他HK$200也沒有的客人竟然掀涉入案件，我覺得很不值，但又可以怎樣？
PS: 是日收到一匿名電話，告訴我的電話被勾線。聽到之後心裡寒了一寒，雖則我沒有做過甚麼，不過這種感覺很不Comfort。我不介意被監聽，但可否告知我何時不會再被監聽？
話說小弟早前睇到東張西望報導新城將會搞Eason演唱會，演唱會仲有Mr. 同Swing，而演唱會Poster中提及o既SAME WRONG SIN就係由EASON, MR, SWING既英文字母組合出黎，作為消費者o既我合理期望當然係有EASON, MR, SWING三個表演單位o既Cross Over(即類似拉闊)。最終結果係：原來呢個陳奕迅新歌發佈會 (除左臨尾三首舊歌同唱o左幾首別人的歌)，唔緊要喇…..SWING同MR每邊叫做各唱左三首歌(其實大部份都係同EASON合唱)，我覺得點講SWING同MR只係EASON演唱會既表演嘉賓，如果係既點解會有SAME WRONG SIN呢個Concert Title？原本我覺得都算，但係再諗一諗，SWING同MR呢兩位Concert Title有出名既單位佢地無乜點Solo，但點解Concert Title完全無提及過既啤梨可以Solo唱三首歌(加埋香蕉俱樂部係四首)？我尊重表演單位，尊重演唱會，就算比一般演唱會早一個鐘(門票寫晚上七點半)我都唔介意捱肚餓捱胃痛準時入場，到頭來原來演唱會係八點半先開始……之前係不斷Loop廣告同聽啤梨香蕉唱歌(東亞廣告不斷Loop o既時候場內已經Hur聲不斷)，成個Campaign對觀眾可謂零尊重。
作為觀眾，我對Mr. Swing表示十分同情，竟然Concert Title有份但係Solo時間比所謂暖場既表演單位更少。而作為消費者，我對今次贊助商印像十分負面。廣告商跟商業機構應該引以為鑑，廣告並唔係播得越多，成效越大。
最後一句：豬扒減肥只係瘦o左既豬扒，新城點搞都係新城。
整整二十年了!!整整二十年了!!為什麼今天晚上仍然有那麼多人在維園？有無搞錯？為何六四還未得以平反？
悼念活動開始，維園最後一行射燈都關閉了，我聽到一些人在叫囂，是不是因為燭光璀璨的關係？民主黨售賣的h9b8系列tee熱賣，早於上星期經已售馨，是不是因為那些tee做得真的那麼好？每年的璀璨燭光，h9b8 tee，要求平反六四都不是我所期望的，我所期望的是六四早日得以平反，還死難者，還難屬一個公道。
記得早前有內地同胞在維景酒店被隔離七日，在臨離開香港時告訴記者：現在香港跟大陸一樣了! 就我理解從他語氣所指的是香港現在跟大陸一樣差。我不知道他所認知的舊香港有甚麼比內地優勝，但我一直認為香港人的優越感是從我們對自由民主人權的尊重而來的，這是經濟再多好都不能抹殺的，直至聽到曾蔭權的一席話……
當天曾蔭權談及自己的意見可以代表香港人，我聽到後的反應沒有像聽到呂志偉及陳一諤的言論那麼氣憤，反之我對自己所相信的有所質疑，究竟香港人是否就如曾特首所說的那麼見利忘義 ? 今天晚上，破記錄的十五萬人給了我一個確切的答案：我仍然是我所相信的香港人。
謝謝香港人!
NetBugs是...