小弟今日睇左林超賢o既”証人”，原本只係想簡簡單單講下套戲就算。不過諗諗下諗返前排睇左套同樣係Made In Hong Kong 陳木勝o既”保持通話”，兩片甚或其導演都係拍警匪片老手，請恕小弟不才黎個兩導大比拼。
睇返Wiki，原來大部份陳導o既電影我都有睇過，反而林導o既寥寥可數。小弟以至網民一致推崇o既”江湖告急”就係林導作品，有睇過o既話一定會記得黃秋生飾演o既關二哥，而我就最記得張耀揚飾演o既”有情有義”手下，另外”重案黐孖GUN”都係我既心水作品。小弟唔識用專業角度介紹林導，但我會講佢o既電影唔太正路，就以”江湖告急”o既任因久為例，並唔係我地睇開古惑仔o個種大佬，詳細唔講，真係買隻HK$20 VCD睇下啦各位(其實唔買都得，TVB年中weekend都重播N咁多次)。
至於陳導，又係主觀直覺睇戲，我覺得佢有o既budget往往多過林導，所以佢拍親o既戲大場面一定多，一定大。(我平時同朋友講開新警察故事就一定會提會展天台o個場，點解會展天台會有張台？)可惜呢個優勢反變成陳木勝o既負資產，有o的場景format實在用得太多，睇都睇到悶，將一堆野用車或者人推散……永遠唔會反車o既車戰，前排先有電台節目數十個成龍電影常見場景，陳木勝都唔可以置身事外，可以俾人咁數其實都幾核突。睇返今次”証人”車戰，林導呢個新嘗試CG雖要有待改進，但已經算係唔錯。反觀”保持通話”o既車戰，感覺似玩踫踫車咁，香港真係需要個high class o的既導演。
我諗如果唔係之前有套西片叫撞車(Crash)，咁”証人”應該叫”撞車”比較適合。演員各有各搶戲，主角謝霆鋒叫座力只能屬二線，不過睇得出佢真係好落力，有一場俾人打o既戲睇得出佢係俾人真打。智叔同家輝風頭有點蓋過主角，尤其家輝做呢個奸角做得好出色。張靜初同孖女都好好戲，尤其係細路女，前途無可限量。
有人話霆鋒o的戲唔得，我岩岩開始睇都覺得佢同個角飾唔多Match，不過看畢電影覺得還可以。至於戲唔得，我認為一來的確有進步空間，二來可能年紀再大些少，多點歲月年華歷練觀感會更佳。總括而言我覺得”証人”比前排o既”保持通話”好得多了，係小弟繼”第一誡”後本年度第二套要為大家推薦必定要入場睇o既港產片，當係奶粉錢俾霆鋒賺下都好丫？
PS：本文其實並無大比拼之意，只係明小陳木勝…….如有被誤導者，請見諒 :p
經過一週從拾封塵三俠後，又黎到緊張時刻。先總結一下小弟做過o的乜：
1) 對上星期一到星期四有玩WiiFit。
2) 原本唔想節食，不過真係想有o的”效果”，我係食少左野。
而結果係：瘦左1.3KG。黎緊下一個星期目標係一個星期玩五次，盡量減少吸收碳水化合物，即少飯，同埋盡量少油，多飲水，盡量食多餐早餐。God Bless Me!!
小弟其實都幾鍾意一個人旅行，我地成日講旅行散心，意思就係離開一個自己熟悉的地方，因為可以俾自己多一點空間，這個空間可以讓自己休息一下，也可以思考一下。幾乎每次去台灣都是住西門町，但最嚴惡也是西門町，好難想像搭了個多小時飛機台北的街頭上，走到阿宗麵線旁邊，十個人有廿個人也是說廣東話，全部都是自己友。天呀？咁同旺角有咩分別？所以去到捷運站，求其上，是旦落，唔跟旅遊書走先係最過癮。
我再對上一次去台北曾經見識過當時號稱穩定度最高的貓空纜車，無獨有偶貓空纜車開辦初期跟香港昂平纜車一樣問題多多，上個月貓空纜車的基座更因颱風關係被淘空4公尺，可能跟未做環評及水土保持計畫有關，問題比昂平纜車有過之而無不及。
幾個月前在台北時跟台灣朋友搭過貓空纜車，及後回來香港時再跟友人搭昂平纜車。可以肯定地說，纜車香港的比較舒適，風景更是大比數勝貓空纜車，因為由地面乘貓空纜車上到山上沿途其實沒有甚麼風景可言，只能影容貓空纜車是運輸工具。但昂平纜車由起點到終點都是一流風景，由世界第一機場到大佛都一覽無遺，名符其實觀光纜車。
但很可惜，昂平市集實在太沒特色，而沒特色這個特色也是香港的其中一個特色。每個商場都是Esprit，G2000，百佳，去任何地方最終買的吃的都是一樣，好聽一點就是方便，難聽一點就是：悶。昂平市集這個遠離繁囂的地方，食的是滿記，Starbucks，Eurogogo，我去葵芳新都會好了！我最大疑問是：點解優之良品都o係度？只能說港鐵公司浪費了昂平市集這個地方，香港商人思維是否只會諗點樣可以收最多租？不如拆鬼o左昂平市集起座APM o係度上蓋再起十座山頂豪宅好了。
在貓空山上，我看不到Starbucks，看不到大型連鎖店，只有一些名不經傳的店舖，坐在山邊，沒有香港山頂餐廳的香港夜境，但仍能遠望台北101，食店食物未必是甚麼美食，不過優閒的感覺足以滿足心靈，這樣說可能有點禪，還是要各位自己去體驗一下。期待貓空纜車重開 
PS：黎緊市建局有機會重建士丹頓街，希望不要變成假保育，扮古蹟的東西出來。
越安全o既地方往往越危險呢句說話真係唔會錯。
幾年前o既年三十晚，小弟同朋友行元年宵，自己走左去Data Centre裝機裝通頂。我坐左o係電腦面前釣魚，當我裝到零晨四點幾五點o既時後，突然”澎”一聲，成部iMAC 20″咁大舊石屎跌左落黎，舊石屎墜落位置同我坐個位只有唔夠半米距離，如果我坐左o係o個個位我諗都凶多吉少。事發過左成分鐘都唔覺有Staff黎睇咩事，我走左去叫佢地黎，個Staff見到都話：嘩~咁大鑊？！唔知係自己大命定黑仔喇……
究竟怎樣為之好的食店呢？人人各有不同，以下是我對好食店的見解。
相信大家都有看過TVB的蔡瀾嘆名菜，其中有一集介紹位於銅鑼灣的吉列專門店，而小弟亦因而慕名而去見識一下。可能經電視介紹過，吉列門口人龍之長令人嘆為觀止，不過小弟為見識蔡瀾推介不惜排隊。排了個幾小時後，太肚餓，我決定落下Starbucks買舊Lamington頂住肚先，前後足足等了兩個幾小時(我不斷催眠自己”就有位”先等到咁耐)，食了半小時左右。說坦白，當可以入去店內開始Order那一刻已經肚餓到無晒胃口，好食定唔好食都無晒感覺了。經此一役，以後當我知道那家店近期蔡瀾有去過的我也必定不會幫襯避免再呆企兩個鐘。而這些排隊經驗只有我們這些平民才會感受到，我敢肯定蔡瀾吃吉列是不用排隊的。
我並不是想說吉列不好吃，而是衡量一家食點好不好吃並不是純粹靠食物，還有環境跟服務。排隊不是問題，問題是值不值得排，環境差不是問題，問題是食物的好能不能夠抵消這個因素。我就是用這樣的態度去衡量食店好壞。
幾年前譚仔還未在深水土步開分店，那時候我是吃譚仔隔離那家昌隆，當時昌隆也時常滿的。後來譚仔於旁邊開分店，當時食過一次，覺得怪怪的。直到譚仔轉了湯底我才”轉場”的。
小弟每個月都會去深水土步兩三次，幾乎每次都食譚仔，因為水準穩定，唯一不穩定是辣度。每次叫五小辣，每次都可能唔一樣，有可能剛剛好，亦有可能辣到癲。如果不太會吃辣可以試一下酸辣或者十小辣。而小弟會選擇加炸醬令米線有小小辣的效果，炸醬一定要另上，一羹炸醬加米線是最好的配搭。另一必試是竹笙跟腩肉，各位有興趣不妨去就近譚仔試試吧！
PS：小弟最愛去的是葵芳店，因為地方超大，坐得比較舒適，沒有群眾等位壓力。
譚仔雲南米線 – Openrice.com
Recent Comments