To share what i see…

今年大年初六晚，talkonly節目做到翌日零晨三點，食埋宵夜(其實可以叫做”早餐”了!!)已經差不多係”清晨”將近五點。我渣車送占士返屋企，之前淨係知佢o係旺角轉N車回家，但係無諗過佢屋企原來遠到連我渣車都覺得勁遠，當時o係度諗：平時佢o係talkonly做成幾粒鐘節目之後搭小巴到旺角轉N車返屋企第二朝點返工？我在車上問佢：咁樣返屋企仲要咁夜咪好”lor”命？佢答：唔”lor”命。

最近心裡我經常對各talkonly主持有個疑問：點解要做talkonly？我經常話talkonly唔係自負盈虧，因為從來都無固定收入，所以talkonly只係一個”自虧”節目。個個星期五晚捱更抵夜做talkonly，返到屋企零晨三四點，仲”支力”過返工但係一個仙都無，真係值得嗎？

我本身其實唔係咁鍾意講o野(以前搭小巴唔係最後一刻無人叫落車我都唔會叫)，口才亦唔了得，只係誤打誤撞o係科網泡沫年代o既Radiorepublic開左個節目，而又咁岩識到小黃做就初期o既talkonly。初期talkonly並唔係諗住講IT，又係誤打誤撞講o左一集寬頻o野變o左做IT節目直到現在。話就話今年係talkonly十週年，其實斷斷續續中間有四年無做到，那段時間有一年我落o左腦場做Sales，可能因為返工講太多，所以工作以外愈來愈少講o野。說話少o左換來係聽多o左，而咁多年來o既聆聽換來一個小總結係：我相信人性本善，但大部人口講同心中所想都會有所差異。

記得有一次請o左個o係學校工作o既嘉賓上黎節目，開台前一齊食飯閒談，當時我在談及校園吸毒問題，嘉賓問我呢o的敏感話題可唔可以細聲o的講。我反問嘉賓點解唔可以o係公眾場合談及社會問題？講真心話應該係人類最自然o既本性，點解永遠要遮遮掩掩？我唔係想怪嘉賓，但實情係當社會人人唔敢或者唔想講真話o既時候，人一定唔會開心，社會衍生問題亦會愈來愈多。而talkonly所堅持係講真話，我地所讚所彈o既未必係所有聽眾所認同，但一定係我地所相信。

答返第一個問題 – 做talkonly真係值得嗎？在我個人而言，此時此刻我仍然覺得值得做。QA經常話o既talkonly風格就我o既解讀係 – 主持中不同立場所產生o既火花。可能大家覺得QA鍾意認叻，但係佢提o既o野夠尖銳，占士雖然說話唔多，但係一句到位，ifg代表住佢o個代，A網友係最有心做資料搜集，地畢最Hyper，馬高對Palm始終如一。我對這樣的talkonly主持組合珍而重之。雖然我對talkonly這種自虧製作模式仍然擔心無以為繼，但無疑因為咁talkonly先可以暢所欲言，無須向任何利益團體賣帳，我相信呢個世界點都要有好似我呢o的咁o既傻仔去顯得聰明人有幾聰明吧？

talkonly一集節目長度分分鐘比某些網台一週節目長度總和還要長，因此與其話講台係一個”節目”不如話係一個”台”。而我經常都有呢個疑問：聽Archive 的聽眾要分多少天才聽畢一集節目？在此小弟十二分感謝各位友好及高質素聽眾對talkonly的支持，當然亦要感謝主持們這些年來的付出。但願talkonly接下來可以好好維持，未敢突破， 但求繼續能為各位聽眾服務，謝謝。

自從”一生人必去食店 – 明漲壽司”一文刊出後，迴響甚大，更甚係得到高登巴打賞識，簡直係威過上CNN。坦白說我是始料不及的，因為到呢一刻小弟仍然視陰陽路十二之生化壽司為當今世上最經典食評，論文字功力小弟不及佢一成。借此機會我先回應一下部份網友的疑問。

1) Youtube上看到杯入面有飯o既短片，應該係上一檯客食唔晒壽司將舊飯倒落隻隻杯再放隻杯上杯架的。我個人當然唔鼓勵浪費食物啦(唔計舊梅菜扣肉壽司，對上一次劣食團我地Order o個二三十碟係全部清晒o既)，不過難保有人第一次去明漲唔知唔係件件壽司都擺得落口，所以係可以理解但未能苟同。

2) 對於”俾少少錢唔好要求多多”呢種講法，雖然明漲有堂食難以與超市壽司比較，不過同樣價錢在超市所買到的壽司份量應該相差不遠。再者小弟從來無話過明漲半句不滿，更甚好多友好經我介紹後都好想去試試傳說中要趁熱食o既熱飯壽司。

“食”對我黎講唔單只係味覺體驗，亦係環境體驗，從不同地方食店去觀察週邊食客是一件有趣的事。好似食明漲咁，有人覺得明漲係劣食地標，但係亦有人覺得明漲係優質廉價壽司。我經常都話：去了解一件事或者一個人，必須要從一樣o既角度，一樣o既視線去觀察，依家機會黎喇!!

自上次劣食團後，不少友好都話我點解唔預佢，因此小弟決定會安排多一次劣食團Regroup，暫定係再下一個星期期中一日，各位友好有興趣可以o係以下網址揀返邊日得閒，夠六個人就會成行，以最多人去o個定為最終出發日，謝謝。

PS：正如有人所講： 板左板右會食物中毒，但就真係無聽過明漲有o的咩事，所以我相信食明漲係安全o既。

http://bit.ly/201003sushit

7/3 有興趣參與下一輪劣食團請看 明漲劣食團Regroup

眾所周知香港係美食天堂，各式各樣美食包羅萬有，食店要突圍食物水準一定要有番咁上下。不過好食係唔足夠o既，因為o係香港呢個美食天堂大把好野食。在云云競爭中，香港有一食店悟出驚世道理 – 做唔到天下第一好，就要做地獄第一差。 無錯!! 一千間食店，有九百九十九間都想做最好o個個，唯獨一間要做最差，計下數就知做”最差”呢個市場係好容易壟斷的。

坦白講小弟已經唔係第一次惠顧呢間野，佢有幾”得”我十分了解。再次惠顧係因為小第看畢當今網絡經典文學之一”陰陽路十二之生化壽司“(如果我今日死o左咁呢篇就係我呢生人睇過最好o既食評，蔡瀾都要死開)，跟朋友們談及該文引起本人萌生再搞地獄團之念頭。而地獄團前前後後都籌備好一段時間，係因為團員名單改了又改，最後出黎o既大部份都係talkonly主持，可見無番咁上下老友真係鬼同你去，去得o既都係有情有義，真朋友!!

當晚我地一行六人破地獄，本諗住閒日無咁多人，最後都等o左兩三個字。

低脂三文魚壽司 – 唔單止健康，仲好環保(睇下碟面就知!)

沙律壽司 – 將椰果，菠蘿，車厘子，粟米整合o既壽司!!

甜蝦壽司 – 終於多左條毛…….係甜蝦至真!! (平時係一舊一條的)

海哲壽司 – 有魚翅的!!!!

肉鬆壽司 – 跑馬拉松中途有水站，食明漲都要抖下氣，呢舊食落已經係最似傳統壽司(at least飯有飯味，肉鬆有肉鬆味)。

紅豆軍艦壽司 – 該款壽司近年已經上o左神檯，甚少o係迴轉帶出現。當我地同Waiter話要三客紅豆軍艦壽司，佢當堂面色一沉，知道我地係識貨之人黎踢館挑機打大佬。正所謂影評唔講Spoiler，呢舊神檯級壽司o既味道留待各位自己親身感受下。

多春魚壽司 – “為食總司令”幟哥畢生鑽研唔同o既海鮮烹調方法，我諗佢萬料不到原來多春魚可以拎黎做壽司!!

(必點!!!)梅菜扣肉壽司 – 遠睇似梅菜扣肉，近睇似鹹魚，由於我係無食到，所以對佢o既真正身份唔太清楚(下文有講點解無食到….)

剛從迴轉帶上方杯架拿出的杯(該文最後有片睇)

今次再戰明漲，絕對保持到水準之餘，亦有不少驚喜。首先係馳名o既熱飯壽司終於有o的改變，除左北寄貝壽司係熱飯外，其他壽司都係冷飯，尤其係炸尤魚鬚壽司，明明睇住佢岩岩整出黎擺上迴轉帶， 估唔到舊飯凍，條炸尤魚鬚仲凍，好似岩岩o係雪櫃拎出黎(仲有些少雪水味)，感覺非常新潁。另外一大驚喜係梅菜扣肉壽司，如果話食紅豆軍艦壽司係打大佬，咁梅菜扣肉壽司應該係Hidden Mode o既超級大佬。 A網友開頭食o左半舊就無食然後講左句oshit!!(日文好食的意思)，小弟認為好野應該同各位分享，所以當時無食到。直到差唔多埋單，由於該壽司賣相實在太吸引，情不自禁地拎起隻碟近距離索o左一野 ………. 氣味先令我有做大肚婆的感覺(作嘔作悶) ，繼而感受到母愛之偉大(感動落淚)，此時此刻我終於明白 – 舊壽司係拎黎聞唔係拎黎食的，各位準備去明漲的話必點(又或者外賣定幾舊，跑跑下馬拉松暈低左既話俾佢索一索保證彈返起身)!!!

事實上明漲分店遍佈港九新界，食客對於其他分店評價亦相當正面，何解偏偏西九店成為劣食地標？外界對呢個問題眾說紛云，有人話呢度就係明漲o既庶務二課，所以搞成咁。亦有人認同本文開頭所講 – 做唔到天下第一好，就要做地獄第一差，邊種講法先正確？呢個係一個……謎!! 無論如何，明漲壽司憑住不斷努力創新，敢於求變o既態度令佢地製作出日本都食唔到，全銀河系只此一家o既Fusion Sushit。

兩次的劣食團後段，我地觀看四周食客，都會有個疑問：點解佢地食得咁開心？隔離檯一位女仕，坐佢旁邊o既似係佢個仔，疑似係阿仔帶阿媽食”好野”。團員訪問個阿媽問佢好唔好食，阿媽一邊搖頭一邊答：å好食!! 此時小弟終於茅塞頓開，亦強烈建議各位一生人一定要去多次明漲壽司。阿仔帶阿媽， 阿媽話好食係引證母愛o既偉大，阿爸帶阿仔去係教識阿仔做人要刻苦耐勞，情侶分手可以叫對方”不如一齊去食明漲壽司”作為借口，聽到o個個一定會話：你係咪想分手？男o既求婚前亦可邀請對方去食明漲壽司，如果可以一齊食完面帶笑容離開，咁可以證明佢係一個可以挨苦，可以共患難o既好女仔，娶得過!!!(小弟亦借似機會為部份食評話食明漲o既就係MK兒女作出平反，食得明漲o既都係克苦耐勞o既好男仔，好女仔!!!! ) 所以話食明漲係充滿無限可能，帶俾你o既快樂比迪迪尼更多，而講緊只係付出五草野有找，快o的約埋班Friend黎西九，食好野!!!

給死士的忠告
- 由於佢地係無Menu的，壽司都係憑空想像出來，建議先搜集本文及其他食家”推介”(梅菜扣肉壽司個名係我作的，因為真係唔知咩黎，所以呢個抄低都無用)，整理好再列印清單以方便Order。
- 最好搵個講急口令叻o既朋友負責落Order，因為呢度waiter唔wait人，我怕你講得慢的話Order o左一半佢已經走o左。
- 盡量坐迴轉帶旁邊，好多新Fusion料理都係咁樣發掘出來的。

烈士的引證 – 明漲雙子塔

小弟雖不能與各位同年同月同日生, 但能同年同日食明漲, 總算共過患難. 一齊硬趙過紅豆壽司, 今後以兄弟相稱!!

預算案發表前， 有人訪問本地學者問佢地市民對於預算案應該有咩寄望，該位學者答：市民應該對預算案的寄望就是 – 無寄望。近年小弟在talkonly一再強調無論政府做得好定唔好都應該自求多福，更寞論現在做得不好。

早前在Twitter看到有人要為中產作出定義，小弟是這樣回應的：大家無需要再為討論何謂中產，M型社會是不會自我復原的，到最後社會只會得番無產同冚家產。這種說法看似很誇張，但貧者越貧，富者越富係事實。中產會因為與社會上層距離越拉越遠而逐漸消失，因為曾司長”經濟發展對所有階層都受惠”的言論我認為是120%絕對錯誤。

曾司長在預算案尾段話依家經濟發展模式係在所難免，呢種講法未必係完全錯誤。要改變現在炒樓炒股這種經濟發展的話，不少現在消費模式都要改變。認識我的朋友應該都有聽過如果唔做IT的話我最想就係開餐廳，每日定時定候開鋪，每個月收入夠食夠住就已經心滿意足，不過要做到咁我相信唔係人人甚或現在的我可以做到，所以在這方面我覺得唔能夠只怪政府。

預算案發表後，相信聽得最多就係：乜綜援又有雙糧出？我都辭工拎綜援啦。我聽過一種說法 – 每一個有錢人會做就八個窮人，貧窮既因社會並非完全沒有責任。每個人都有自己的故事，唔能夠因為部份好食懶飛的人去judge所有拎綜援的人對社會無貢獻。事實上從通漲角度綜援本身是有需要提高金額，但政府不願意為這些問題作長遠安排，反之只用上一次性撥款去做所謂舒困措施，不單沒有承擔，”雙糧”二字亦令納稅人感到不舒服，兩邊不討好。

以上種種問題其實唔單止香港有，究竟應該點處理呢？上星期節目談及吸毒問題，聽眾話政府只有驗毒方案，卻沒有處理吸毒學生的配套，是因為現有資源根本冇可能協助大量吸毒學生戒毒，亦因而避免涉及有關範籌。而我的看法是，有些問題可能現在我們沒有完整的解決方案，但總要從解決問題的方向踏出第一步，總不能等仆街吧？

以前的香港？

上年年尾，TVB連續三個星期六深夜重播吳宇森經典電影”英雄本色”三部曲。記得在第二集，狄龍得罪了江湖中人，有一大班古惑仔走去狄龍打工的的士車行破壞，車行老闆曾江不單沒有責怪狄龍，還協助他逃走。這種人的情與義，現在的港產電影甚或現實社會已不復見。

現在的香港？

沙士那年，有家酒樓倒閉，老闆在最後一晚發遣散費兼且請員工吃一頓飯，這件事不但刊登在港聞版，更是刊登在港聞頭版(因為當時其他酒樓倒閉老闆都是一走了之，因此這個做應該做的老闆變成了英雄)，好人真的在香港買少見少嗎？

農曆新年有個不成文規定，政府部門在初一至三有兩不管：違例泊車和車仔檔。各區大街小巷總是人頭湧湧圍在那些車仔檔，朝早拜年逗回來的紅包就是用來晚上去掃街。小弟家住青衣，以往每年長發新年的車仔檔都熱鬧非常，”新年氣氛”就是這樣來的。但近一兩年的新年，食環署不管的領匯來管，各位可以看作合情合理，請恕我只能看作是 – 趕盡殺絕。 雖然車仔檔還是存在，但恐怕還是買少見少，難道這樣有特色的港式小食就此沒落嗎？

總結以上所寫的疑問，我對現在香港的感覺是：空間愈來愈窄，人情味愈來愈少。無論老一輩還是現在的八十後，我們也不曾感到現在的香港不比過往的好。以前的香港無論有多困難我們總有些空間可以就出困局，現在年輕人好像總是沒有遠景的。客觀事實是：香港沒有精神生活，心靈富足是假的，在這裡生存必先要懂得遊戲規則。我一直認為高地價政策是其中一個令香港經濟急速發展的同時亦令貧富懸殊加劇的根源。租金高企令商戶經營越趨困難，顧主繼而壓榨員工，員工生活空間越來越少。高地價政策最恐怖的不是政府對地產業的支持，而是政府在地產範疇以外的政策也會變相推高樓價，高鐵如是，活化工廈如是。

早前聽了友人的”麥當勞理論”是這樣的，過往十幾年，麥記食物售價近乎每年都有上升，連帶集團經營收益接近逐年遞增，但員工時薪基本上沒有大改變過，按照這個趨勢，固然有錢人愈來愈有錢兼且令物價上漲，下層的人生活只會愈來愈苦，爆煲只是時間問題。

說實在，請恕小弟對社會沒有大建樹，我也不知道以上的問題該如何解決，我只知道問題只會愈來愈嚴重，自私一點來說，我能夠做的只是先令自己不要踏進浮沙池，就只有這樣子吧？

近期小弟文章比較多提及”80後”，今次為各位介紹屬於”八十歲後” Clint Eastwood執導新作Invictus “不敗雄心”。

Invictus講述南非前總統曼德拉渡過廿七年牢獄後做總統，及後透過欖球賽去改善種族問題。我個人本身十分喜歡Morgan Freeman這位演員，今次他亦不例外演活了曼德拉這角色。而Clint Eastwood透過麥迪文飾演的欖球隊隊長以及總統身邊的人去讓觀眾可以設身處地去想曼德拉所想，這方面Clint Eastwood處理十分不錯。觀看這部電影時我很感動，曼德拉可能不是一個那麼完美的總統，但曾蔭權肯定是一個不聽民意的特首。

整體電影相當不錯，是本年繼”美食瘋球”後個人認為必看之作，一定好睇過依家上畫幾套大片。入場前最好養足精神，因為Clint Eastwood的電影對白句句精警，絕對不能miss任何一句。如果看過後覺得唔錯可以睇返Clint Eastwood自導自演的Gran Torino “驅逐”，同樣十分精彩。

好多人都話我做Review都有Bias，我亦唔敢講我無，因為友人同我講過呢番話：你用唔慣其他電話係因為iPhone太易用。以上呢番話堅有人同我講過，我Load o左陣問o左個問題：咁係咪應該怪iPhone太易用？我曾經講過，腦記問代理”借”Product黎試，唔使錢o既o野一定好，因為只有得著沒有付出，所以做Review一定要Concern埋價錢，講到天上有地下無最後原來自己一o的興趣都無你話幾meaningless呢？

就有關Bias o既原故，我覺得問人借機黎試幾日意義亦不大，所以小弟真金白銀分別買o左09年底大熱o既 Motorola Milestone同雷聲大雨點小o既 Google Nexus One，以一個iPhone 3GS用家身份同各位分享下使用經驗。

先講Milestone，還記得當年”電腦廣場”做電話測試係試話音質素，到依家試電話只會試影相靚唔靚，Effect多唔多。Milestone係回歸返電話基本步，鈴聲夠響，震得夠勁，話音清晰，尤其配合其Crystal Talk功能另用家就算在機舖亦妨如置身家中，反觀其拍照功能就顯得虧虧地(詳見前文)。至於Nexus One，話音未見因為Dual Mic設計而得以改善，鈴聲拆聲，震o左好似無震。N1用o既OMLED顯示未見特別靚，但可以肯定係日光底下變o左部”HTC Mirror”，乜都睇唔到，淨係望到自己。更大問題係，N1個Screen容易吸面油，但極難清潔。如果係iPhone或者係Milestone如果有面油可以用手指捽乾淨(就算唔乾淨最少都睇到畫面)，但係N1只會愈捽愈濛。種種問題加埋個極不就手o既Trackball，說坦白我對N1 First Impression 不太好。而Milestone同N1有個共通點(可能其他Android機都有)，就係下方”四大天王”(即Back，Menu，Home及Search按鍵)十分容易在按屏幕下方時掂到，個人認為Low Tech o的將”四大天王”變返做Physical Key會比較好。

到實際操作，唔知係Android 2.0同2.1玩是CPU o既分別，N1效能的確比Milestone快好很多，用開iPhone 3G o既人尚且會覺得Milestone快o左，但係作為iPhone 3GS用家Milestone現有速度對我黎講直情唔usable。值得留意係，N1 CPU 已經去到 1GHz，相對3GS 600MHz CPU效能只係相若，可見Android絕對唔細食。總結Android軟體操作速度上N1壓到性贏Milestone。

如果單從Milestone同N1要揀一部買，我會建議等到Milestone出Android 2.1升級再比較下先，因為坊間有測試Droid (即係美版Milestone)行Android 2.1效果同N1相若，係o既話我就傾向買Milestone而唔買N1，話就話N1 CPU快，但係N1由個Screen到Speaker都做得太求其。舉個簡單例子，如果將部N1放落隨機附送o既保護套再袋落衫袋，根本無可能聽到電話打黎，HTC佢地有無諗人地買部電話返黎係要用o既呢？只能慨嘆Google選錯了合作伙伴。

下期會再同各位講講Android機同iPhone使用經驗與比較。

記得N年前去到舊同學屋企幫佢屋企人整電腦，Uncle話電腦著唔到，最後我發現係因為隻Floopy插住左所以著唔到機，著機之後幫部電腦做過Virus Scan我就離開。離開之後Uncle給了我利是，說老實我的確有點唔好意思，因為Uncle每次俾利是銀碼一定不少，如果因為一隻Floppy而收下這封利是實在有點兒那個，不過每次Uncle都一定要我收下，我也沒辦法。我跟他說唔好意思的時候，他說了一句相信我呢世都會記得的說話：銀紙只是一張紙。

大家可以認為這種說話只有富貴人家才有資格說，但對我來說這句話背後有其大意義，因為錢對不同人可以有不同意義。以高鐵事件為例，有人會覺得利益至上，唔好阻住我地搵錢，香港是經濟至上，否則仲賣緊香。而我認為，人在世不能沒錢，但錢一定不是最重要。不能否認我能夠這樣說是基於小弟生活環境尚可，可以令我在talkonly暢所欲言，寫Blog亦不用賣其他PR帳。但我一直有一種想法：社會上弱勢的一群他們要為口奔馳，未必有能力說出他們對社會的看法。有人話現在年青人生活太安穩不知民間疾苦先會出來攪攪陣，我卻反過來認為作為有能力的我們，為何不為社會做更多，說出我們想法？我可不想香港毀於我們這一代。

無論各位覺得錢為何物，如果各位有能力的話，請支持各團體現在為海地地震辦的籌款活動。現實點說，對於海地災民來說，可能捐款才是最實際的幫助。希望各位朋友多多益善，少少無拘啦!!

近排個Blog給予朋友有點政治化，其實我都唔想，不過主流傳媒實在未能表達某些事實，而我堅持的是”說我所相信，寫我心中所想”，但願小弟的”反面邏輯”可以為各位帶來”正面思維”。是時侯回歸自己的Blog….

差不多每年新年過後，腦場定必有一兩間鋪到初七初八都未開，那個時候大家都大概估到是老細走佬，然後EZONE跟PCM腦記又會走去訪問大代(理)有多少損失。這個場面見怪不怪，而往往不消一個月又會有另一家新舖上場。不過今時唔同往日，腦場生意好像越來越差，旺電吉舖很久亦未換上新舖，為什麼會這樣呢？

我記得十幾年前我仲讀緊中學，每日放學都要經旺角轉車，而差不多每日轉車前都會去旺電看一看。一個月四個星期，每個星期五日，當然不可能日日都有東西買，甚或差不多每次都只是Windows Shopping，現在回想起來也覺得自己奇怪，天天都看接近一樣的東西不會悶嗎？

還記得第一次自己儲錢買的Hardware是初中在旺電買，是一台UMAX Scanner，那個超慢，超多網紋的Scanner。買下Scanner後搭巴士回家，因為當年Scanner有點大份所以一上車直接坐在司機位旁邊。坐坐下司機跟我談及電腦的事，就此我便多認識一位電腦玩家(及後他介紹另一位司機給我認識，他閒時會去寫電腦程式，認真估佢唔到!!)。及後當年在newsgroup pc版組團在旺電買Sound Blaster Live再仆去會展排隊換喇叭(那時在newsgroup認識了小巴，在talkonly節目我首次邀請了小巴，及後小巴介紹Q&A跟流料ROY給我認識，所以沒有當年買Sound Blaster Live的話亦未必有今天的talkonly)，間接認識了ANA老闆，而中五畢業時他給了我工作機會，在ANA工作的那一年學到了不少，亦十分感謝Anthony，對我來說他是我恩師。

說了這麼多或多或少各位會明白小弟對旺電莫明奇妙的情意結，腦場黃金時代在於組裝機，後期已經是PDA。現在組裝跟原裝機價格已經很接近，當年硬件速度競賽亦不復再，PDA亦演變至今天的Smartphone，現在消費者比較傾向在大型連鎖店購買電腦或者Smartphone。這些是現在旺電或者腦場死因嗎？是租金太高， 還是腦場已經過氣，是時候轉型？我不知道，但正如早前小弟曾經提及，區議會不要再資助那些根本無需要資助的電腦節，現在電腦節所做的，人家腦場電腦節一樣做到，賣的貨根本就是一__樣，區議會要交功課做政績可以做很多(例如”根dum大賽”)，何必要亂用公帑去跟腦場直接競爭，不要令香港的”大市場小政府”演變成”大市場想小政府”吧。

昨晚去了博覽館看Green Day演唱會，基本上我每隔一段時間就會那出iPhone，不是因為演唱會悶，而是有點擔心立法會外的朋友跟其他市民所以看一看Twitter跟即時新聞。

流料ROY說過：係邊類人就會同返邊類人一齊。無錯，我認識的不少Twitter朋友昨晚都有在現場，我亦不厭其煩再次重申小弟立場：我是支持用較經濟方式起高鐵(主流傳媒應該將我定性為反高鐵吧？)。說坦白，我覺得政府未必沒有足夠理據去反對錦上路方案，不過政府那種過了海就是神仙的態度實在值得商榷。在成熟公民社會，要100%市民去支持單一議題並不可能，基於自由與開放，總有些人會讚成，總有些人會反對(社會亦因此而需要付出代價，而個人認為是值得的)。我並不是硬銷派，無意去改變支持高鐵朋友的看法，但我是十二分尊重正反兩方的意見，因為佢地(或者”我地”)都有個共通點 – 想香港好。我所強調的尊重是在於對持跟自己意見相反的人要先問點解，而並非直接去否定別人看法。我認為透過了解相反意見是提高自我判斷力的重要一環，所謂”和諧”是指和而不同，而並非像政府漠視反對聲音，那些只是河蟹。

在看Green Day前，昨日我有在皇后像廣場逗留過一會。相對上星期五晚，人數多了很多，苦行人數亦由數個人變成幾十個人。出席該活動除了以示支持外，個人認為就算並非反高鐵的的人亦應該嘗試去看看現場情況作為通識體驗。在電視看到的，只是暴力，暴力和暴力(因為記者企足全日亦只是等暴力，暴力和暴力)，而事實上極大部份在現場的人都是平和的，”反高鐵”是甚麼一回事並非能在報紙或者六點半新聞所能了解的，必需要在現場，處於示威者同一視線才可以感受他們所感受。我所看到的是一場比五區總辭來得更早的新民主運動，年青人的熱血已經不再甘於”行完就算”的遊行表達方式，這不是對或錯的事情，而是消防員救火 – 火燭的時候有消防員去救火當然係好事，問題是為何會發生火燭？相信無一個消防員的夢想是：我想救多o的火!

如果我是鄭汝樺，我一定會先叫停高鐵撥款方案，因為高鐵撥款通過已經觸動了功能組別對市民的對立面，整件事變相幫助了五區公投一把。現在公民黨跟社民連心底裡對政府一定是萬分感謝。

我NetBugs是一個怕死的人，我不吃煙不是因為注重健康，而是怕死。當年失戀想過自殺但最後沒有死去，也是因為怕死。我也是一個貪生的人，我的自私在於希望自己的家香港有一個更好的政府。很抱歉地昨晚我沒有留到最後一刻，但我還是十分支持和諒解包括示威者和警察在內的香港市民，感謝你們!!