NetBugs’s Blog

係，我又去台灣喇。我記得上次一人遊台北係星期一買機票，星期五出發的。今次好些少，仲有成個星期。

香港人真係好有錢，前年去台灣幾日前訂Package都仲有好多選擇，今年旅行社Full晒，係我通頂搵左幾粒鐘先搵齊機票酒店。今次台灣之行希望可以見識下台灣選舉文化亦都俾自己有機會Relax下。

我記得對上一次一個人去台灣已經係兩年前，那次也是我第一次去台灣，台灣對我來說是一個可以給我放鬆的地方，希望此行可以達到我的原意。

話說上個月，小弟辛辛苦苦排左成粒鐘，最終都係得個桔，買唔到飛。但係經朋友幫助下，成功班到林海峰門票………….擦擦卡八張咁多。小弟將擦擦卡o既密碼逐個填上網站，等左咁耐都無回應，以為無望，佢地竟然上星期四打俾我，仲話有成四張飛咁多。

講返個Show，其實大部份人最大o既Question係：究竟佢係唱歌定係講野嫁？不得不讚係林狗好成功地Fulfill到睇talk show同埋演唱會兩批人。娛樂性應該係三個是但up當中最好，EDC唔係講好多，不過有著好重要o既點綴作用，呢個係近期大家最有共鳴既話題。至於紅館搞talk show，可以話係純商業考慮，我睇完都仲有丁點保留，始終互動性較低，感覺上無伊館睇子華咁好。其實talkshow內容已經比過去兩次好得多，但係林狗talkshow成功位係noise，就算過去兩次內容麻麻都總會有一兩個計算再內既gag位係一定得，今次都唔例外。日後出碟都可以考慮買隻睇睇。

香港人有共同的優點同埋缺點 - 單純。我地(包括我自己)都可以因為一兩個畫面去相信有些事繼而做某些事，例如睇完內地災情我地會毫不吝嗇地捐錢，又例如我地朝早返工拎份頭條日報睇完就會認為阿Gill淫照係移花接木，一睇就知係假。所以有時我都幾欣賞外間定性所謂o既網民，至少有基本需要的獨立思維。就以昨日中電事故為例，有人惡搞明報即時新聞轉寄話事故係大亞灣出事，我地至少識得去mpinews.com印證下係堅定流。學董先生話齋，傳統傳媒過往的行政、司法、立法三權以外第四權角色已經唔存在，現在第四權是屬於網絡社群。

踏入鼠年，唔知係咪犯太歲o既關係，開工Day 1已經唔係太如意，鬧人鬧到無晒氣。今日嘗試以欣賞角度讚賞下周融先生，周先生成功將欽點與否問題變成學歷歧視問題。坦白說，大家都明白政治的運作方式，你要做又或者要你做，Fine，誰個理會？特區政府PR真的很有問題，周先生有幾受歡迎大家心裡有數，雖然用甚麼方法欽點他都會惹來反響，但怎樣反響相對細呢？不如直接先斬後奏”破例”方式比較好，現在騎騎呢呢周先生前後七日口供不一，唔係話唔得，核突o羅。事實上問題並不在學歷上，而係整件事政府發佈得有點突然，似乎想搏大霧。同埋周先生可能多對咪少望鏡頭，做戲其實唔需要太浮誇。應該要學下EDC，同樣係轉移視線，但係就高張好多，將Focus Point完全指向法律問題，法律以外問題用Deeply Sorry簡單而又得體地略過。今時今日，”轉移視線”才是王道。

星期六晏晝，舊同學打電話俾我話學校搞開放日，問我去唔去，我二話不說就應承左，因為自中五畢業之後我已經無返過去。上個月o係附近學車經過o既時候已經上入去行下。講真，雖然我唔算係波記o既傑出校友，不過我經常同朋友講，係波記話我知應該點做一個人，我到呢一刻都可以好Proud of自己係波記仔黎。

講起傑出校友，開放日o個份o野真係有List到”傑出校友”名單，除左我已知o既黃成智外，麥潤壽原來都係校友。最估唔到o既係關智斌，仲有我最憎o既明光社總幹事蔡志森，估唔到……

學校變左好多，以前教我o既老師大部份都仲o係到，仲要多左好多新先生同埋一座新校舍，加上我睇璧佈版話入大學百份比去到84%，我諗學校近 梗係好”掂”。不過聽阿Sir講原來因為政府Cut資源，有o的非常規學校學生都o係常規學校就讀，雖然話有教無類，不過有幾惡搞大家都可以想像到。政府隔岸觀火o既同事，真係多謝晒咁多為阿Sir Miss。

唔計N年前亞視播o個o的棟篤笑雙打，小弟真真正正睇過棟篤笑從而認識黃子華係幾年前仲o係腦場做野o個陣。當時分舖做LCD Demo就係播緊黃子華既拾下拾下，亦都係咁樣我真真正正知道佢係乜水，而第一次睇現場係零三年七一前夕既「冇炭用」。黃子華最唔簡單既係可以連續講兩三個鐘笑話，而笑話仲可以笑中有淚，包含人生哲理，今次「愈大鑊愈快樂」亦不例外。

香港人經過金融風暴之後，以為終於知到要腳踏實地，不過炒風回歸，香港人心又回歸到十年前。個人認為子華今次係想大家重新瞭解自我同價值觀。有得笑又有反思既talkonly，今次終於無乜人嗌回水喇。相隔對上一次棟篤笑僅一年，有此效果實屬難得。

經濟好，乜野都話要加價。車費加，油費加，豬肉加，連睇戲戲票都加價。所以盡可能都小心選擇電影先進場欣賞。今日小弟無意中聽到903節目”五天精華遊”，實在非常興奮，因為佢地講緊My Blueberry Night，佢地唔係做緊Movie Review，係Movie Spoiler，我又慳返六十蚊喇。多謝卓韻芝，You are my BT seed.

我諗香港人食得最多既甜品離不開許留山，滿記之流。其實食甜品選擇仲有好多嫁。

尋晚我就去食左御品居甜品， 最易行去既方法應該係由廣華條街一路行後就會行到去。未去過既話一定要試雪糕桂花茶凍同埋真心湯圓。 新潮甜品又要食得落口呢間都算係中上喇，還記得幾個月前去仲係好好生意，唔知點解尋晚拍烏蠅，唔會係因為前排蘇絲黃勁踩佢地掛，係就可惜喇，講唔好食大把o係佢地之上啦。

正御品居甜品

我諗咁耐以黎唔計中菜，近年食得最多除左迴轉壽司以外，就係泰國菜。令我對泰國菜著迷原因係因為一道菜 - 生蝦。相對日式甜蝦刺身比較有口感，配合特有醬汁成為每次去食泰國菜必叫既一道菜。唔知點解比較大間或者連鎖式經營既泰國菜館都係無生蝦食(定係其實泰國係無生蝦？)，好似我有一次去旺角山東街一間上海菜館食飯，叫個菜飯侍應竟然同我講「無得咁叫喎。一係叫一碟菜，一個飯」，其實上海係咪無菜飯？(估唔到呢間野未執笠。)

要食好食既泰國菜，梗係要去九龍城，真係唔知點解會九龍城泰國菜館會多成咁，但係間間都好旺場，而基本上我同朋友之會食兩間，一間就係街市泰國菜館。o個度既芒果汁係我飲過最好飲，唔會太水，又唔會太”杰”，岩岩好。不過可惜衛生麻麻，成日食緊野都會見到附近有小昆蟲搵食，所以我地依家只會去隆姐。相對其他九龍城泰國菜館隆姐唔算係最旺場o個間，不過食物真係Keep到水準，呢度既生蝦會有埋個炸過既蝦頭俾你食埋，仲有釀雞翼，豬頸肉沙律等等，幾乎樣樣都係咁好食。去左咁多次唯一既污點係對上一次去食完屙左幾鑊，咁多次先屙一次，意外黎掛?

上星期去左屯門食另一間泰國菜 - “小曼谷”。行到落去以為唔見左間舖，原來係細舖搬大舖去左對面。未夠七點已經多人到痴肺，等左成粒鐘終於有得食，食物其實唔算差，不過相對隆姐呢間野真係得個名之餘仲要毫無誠意。青檸水變青檸冰都接受到，但係叫豬頸肉沙律變左燒豬頸肉然後求其同你落o的洋蔥將燒豬頸肉兜亂「變」豬頸肉沙律真係接受到，唔該俾o的Heart啦。

隆姐泰國美食館

昨日重澳門回來看到的第一單新聞就是天水圍的家庭慘劇，一名家庭主婦先後推自己兩名子女落樓繼而自殺。點解每次慘劇都係發新於天水圍？

今次已經唔係第一次有內地持單程証家庭主婦來港出事，好多內地來港家庭或者另一半係內地人o既低收入家庭因為貪天水圍房租平搬晒入去住。咁係咪即係資源唔夠？社區支援電話係咪真係廿四小時就幫到佢？點解唔倒返轉問，其實政府或者佢地自己有無諗過o係香港有無能力負擔生活所需？定係諗住來香港就靠綜緩過活？可能大家確得我有點涼薄，但係我確信，內地來港單程証政策一日唔改，就算社區資源再多問題永遠唔會得到根本解決，香港係咪真係一個好到咁既地方？

你有無對自己的存在不曾存有質疑？我不夠膽像哲學家談生命的意義，不過我有些朋友經常說，活著沒有甚無意思，為何自己存在這個世界上。

 我覺得每一個人存在世上總有其價值，一日唔死，一日都有存在意義，是甚麼就要自己尋找。有時嘗試諗下別人的想法，將心比己，你就會發現其實自己所做的每一個決定都在影響其他人，你是存在於世界而並非”透明”。可能你會認為你不想影響其他人，不過人生命就是人與人連繫著，這是任何人都不可以改變的事實。人嚮往自由卻往往受制於某些現實，積極樂觀面對人生對自己甚至身邊的人總比消極的來得好吧。